Ihlombe ngodilika onikwe umdlwenguli
SISHAYELWE ihlombe isigwebo sikadilikajele esinikwe indoda yaseMpangeni eneminyaka engu45 elahlwe yicala lokudlwengula indodakazi yayo yagcina ngokukhulelwa.
Le ndoda igwetshwe ngoMsombuluko enkantolo yesiFunda eMpangeni ngemuva kokulahlwa yicala lokudlwengula indodakazi yayo okuthiwa yaqala ukuyinukubeza ineminyaka engu8 yaze yakhulelwa isineminyaka engu-11. Le ndoda yabanjwa ukuthi ibigila indodakazi yayo le mikhuba ngesikhathi iyihambise emtholampilo iphethwe yisisu. Kwatholakala ukuthi ikhulelwe, umgilwa watshela unesi ukuthi nguyise obemnukubeza uma unina engekho.
Ingane yale ntombazane eyayisinezinyanga ezingu-8 ikhulelwe kuthiwa yayibeletha, yashona.
UNgqongqoshe wezokuThuthukiswa koMphakathi KwaZuluNatal, uNkk Weziwe Thusi, uthe akazi ukuthi umuntu odlwengula indodakazi yakhe usuke engenwe yimuphi umoya kodwa uyajabula ukuthi amaphoyisa nezinkantolo bakhona ukukhombisa ukuthi abenza izinto ezinje angeke babekezelelwe.
“Le ndoda ibifanelwe wudilikajele ewutholile ngoba imoshe impilo yengane,” kusho uNkk Thusi.
Useyalele abezenhlalakahle ukuthi baqhubeke nokululeka ngokomqondo umgilwa nonina ukuze balapheke ngokuphelele.
Iqembu i-EFF nalo lisamukele isigwebo lancoma ukusebenza kophiko lwezobulungiswa ikakhulukazi kuleli cala.
Esitatimendeni esithunyelwe ngokhulumela i-EFF uMnuz Mbuyiseni Ndlozi, leli qembu lithi kubuhlungu kakhulu ukuthi amadodakazi akakwazi ukuqinisekisa ukuthi aphephile noma ehleli noyise.
I-EFF ithe ifuna ubulungiswa obufanayo odabeni lokudlwengulwa nokubulawa kukaNksz Courtney Pieterse, wase-Eerster Rivier okuboshwe isiqashi ngokugilwa kwakhe.
I-EFF ithe imiphakathi kumele iqhubeke iqaphele yenze nemizamo yokulwa nodlame olubhekiswe ezinganeni.