Umkhankaso oqondiswe emadodeni
UZOYISWA emahostela umkhankaso wokukhuthaza amadoda ukuthi avikele abesifazane nawo aphinde azinakekele.
Lokhu kuvele izolo ngesikhathi kwethulwa umkhankaso owaziwa nge-Ubuntu Initiative: Men Taking Responsibility okuhloswe ngawo ukukhuthaza abesilisa ukuthi bavikele abesifazane nezingane.
Umkhankaso wethulwe ngokubambisana kwezinhlaka ezahlukene okubalwa kuzona uMnyango wezeMpilo, iSouth African Aids Council (Sanac) amaqembu ebhola, Amazulu neJomo Cosmos nenhlangano yamahostela, Ubunye Bamahostela. Kulindeleke ukuthi umlingisi owaziwa ngoKgosi kwiThe Qeen, uSello Maake kaNcube, alingise emdlalweni wesiteji ozodlala lapho kuhlangenwe khona uma kugqugquzelwa umkhankaso ukuze amadoda azi ngokubaluleka kokunakekela abesifazane nezingane.
Bazoya emahostela okubalwa kuwo iWema, Jacobs, KwaMashu namanye lapho abesilisa bezohlinzekwa khona ngezinhlelo zezempilo ezahlukene kuphinde kuxoxwe nabo ngokuvikela abesifazane nezingane. Kuyobe sekudlalwa nemidlalo yebhola nomdlalo kaMaake kaNcube.
Ethula umkhankaso uNgqongqoshe wezeMpilo KwaZulu-Natal uDkt Sibongiseni Dhlomo unxuse amadoda wathi akashintshe indlela asebukwa ngayo ngenxa yezehlakalo ezithusayo zokuhlukunyezwa kwabesifazane.
“Amadoda enza kahle kufanele kube yiwona aba ngamanxusa amadoda enza kahle ngoba izehlakalo ezenzekayo azisho ukuthi awekho amadoda enza kahle. Indoda nendoda eyenza kahle kufanele ibe yileyo ndoda amanye abukela kuyona,” kusho uDhlomo.
Ukusho lokhu nje kusanda kuphuma imibiko eminingi yokubulawa kwabesifazane bebulawa abantu abathandana nabo nabasondelene nabo. Esinye isehlakalo esishaqise abantu ngesokubulawa kukaNksz Karabo Mokoena nokusolwa ukuthi wabulawa yisoka lakhe uMnuz Sandile Mantsoe.
UDhlomo uthe banethemba lokuthi izehlakalo zokubulawa kwabesifazane zingagcina zinqandiwe ngokulethwa kwalo mkhankaso.
UMaake kaNcube uthe akuthandayo ngalo mkhankaso wukuthi ugqugquzela ukubuya komuzwa wobuntu kubantu nokuyinto abantu abaziqhenyayo ngayo.
Kuzoba nemidlalo yebhola ezobe inamaqembu ebhola Amazulu neJomo Cosmos. Omunye wayo uzoba ngoJuni 18 ePrincess Magogo Stadium, KwaMashu.
Umphathi weJomo Cosmos, uMnuz Jomo Sono, uthe banethemba lokuthi ibhola lizokwenzela abantu le nto elamenzela yona, ukubanika ithemba. USono uthe uvume ukuba kulo mkhankaso ngoba ekholwa wukuthi izingane zibukela kubantu abavela kuthelevishini njengoba ziyibuka ubusuku nemini futhi zilithanda ibhola.