Ukhuthaze abezempilo ehlonishwa
UKHUTHAZA abasebenzi bezempilo ukuthi baphathe iziguli ngendlela abangafisa ukuphathwa ngayo umphathi wabahlengikazi wasesibhedlela saseKokstad, i-East Griqualand and Usher Memorial ohlonishwe ngomsebenzi wakhe.
UNksz Thembisa Nxokweni ungomunye wabasebenzi abasanda kuhlonishwa ngezindondo nguNgqongqoshe wezeMpilo KwaZulu-Natal, uDkt Sibongiseni Dhlomo ngomsebenzi wabo omuhle. Uthole indondo yokuba ngumhlengikazi ovelele ngenxa yomsebenzi awenze kusukela efike kulesiya sibhedlela ngo-2014. Uhlonishwe emcimbini i-MEC’s Annual Service Excellence Awards (MASEA) 2016/17 ngoLwesihlanu, obekungunyaka wesine wenziwa.
UNksz Nxokweni ungumatron emagunjini abhekele ukunakekelwa komama abakhulelwe, ababelethayo, asebebelethile nawezingane kulesi sibhedlela. Uthe ukholwa wukuthi uklonyeliswe ngendondo ngenxa yoshintsho alulethe kulawa mawadi kusukela eqalile ukusebenza kulesi sibhedlela.
Ngokusho kwakhe, bezilinganiselwa ku-35% kuya ku-40% izingane ebezishona zisanda kuzalwa. Lesi sibalo sesehle safinyelela ku-11% futhi unethemba lokuthi sizoqhubeka nokwehla. Uthe seziyaphela izinyanga ezintathu ingekho ingane eshonayo.
Ngaphandle kwalokhu ulethe uhlelo lokuhambela iziguli emakhaya azo ngenhloso yokuthi bangazilindi zona zizizele esibhedlela.
“Into engiyaye ngiyikhuthaze kubantu engisebenza nabo wukuthi sinike umphakathi usizo lwezempilo esingathanda ukunikwa lona nathi. Kusukela ngifikile la ngikhuthaze abasebenzi ukuthi siqikelele ukuthi ayikho ingane eshonayo,” kusho uNksz Nxokweni.
Useneminyaka engu-21 aqala ukuba ngumhlengikazi kodwa ubeqala ukuhlonishwa okunje nguNqongqoshe. “Ngathuka, ngajabula kakhulu ngesikhathi ngithola ukuthi ngithole indondo. Bengingalindele ukuthi umsebenzi wami la ekhoneni lami usungaze ubonwe ngungqongqoshe. Lokhu kuyangigqugquzela ukuthi ngiqhubeke ngisebenze ngokuzimisela nethimba lami.”
Uthe bazimisele ukwenza okukhulu kunalokhu asebekwenzile. Kuyimanje useqalile ukuxhumana nabaholi bomphakathi ngokuletha ezinye izinhlelo emphakathini njengokuqwashisa umphakathi ngobungozi bokuchatha izingane.
Ukwenzile lokhu ngesikhathi eqwashisa ngokubaluleka kokuncelisa izingane nezinye izinhlelo kwayimpumelelo unethemba lokuthi namanje kuzoba njalo. “Nginenkolelo yokuthi kufanele siphume thina siye emphakathini singalindi abantu ukuthi baze esibhedlela.”