Usefeza iphupho umfundi oqopha amafilimu
AKAFUNI ukulinda aqede isikole ukuze afeze iphupho lakhe umfundi waseLovu oseqalile ukuzishuthela amafilimu aziqophela wona kumaDVD.
UVusi Hlatshwayo (20), ofunda uGrade 11 eHlengiwe High, ufisa ukuba ngumdidiyeli nombhali wamafilimu njengoba eseqalile ukwenza amathathu, amanye alingisa kuwo. Lo mfundi ongakaze aqeqeshwe kulo mkhakha, uthe uthando lwamafilimu ludalwe wukubuka amafilimu akuleli abizwa ngeMzansi Bioskop adlala kuMzansi Magic. Waqala ngo-2015 ukuhlanganisa ulwazi lokwenza amafilimu abeluthola ngokubuka adlala kuthelevishini.
“Ngaqala ngefilimu ethi Abazali engayishutha ngo-2015 nami engidlala kuyona nabanye abangani bami. Ngangikade ngifunde enye incwadi eyayikhuluma ngezimfihlo zabazali ezigcina zifaka izingane enkingeni. Ngonyaka odlule ngenze ethi Devils ngalandela ngethi Ikusasa Alaziwa engiyishuthe nonyaka,” kusho uVusi.
Uthe amafilimu uwashuthela eLovu, eNanda naseMzinto.
UVusi uthe waqala ngokushutha izithombe okuyinto asayenza namanje. Imali abeyithola ubeyibekela ukuthenga umshini wokushutha ama-video.
“Ngiyazibhalela ifilimu, ngizishuthele ngibuye ngisizane nabanye abangani bami baKwaMashu. Ukuhlela nakho ngiyazenzela kodwa anginayo imishini namakhompyutha ngisebenzisa eyabangani bami,” kusho uVusi.
Uveze ukuthi amaDVD uwadayisa ngokuhamba engena emizini yabantu. Usaqhubeka nokushutha izithombe emicimbini ukuze aqongelele enye imali yokuthenga imishini yokuqopha. Ufisa nokuthola inkampani yezamafilimu engamchushisa ukufeza iphupho lakhe uma eqeda esikoleni. Uke washutha ne-video yengoma yomculi kamaskandi uPhumlani Mgobhozi.
Uthemba ukuthi ngelinye ilanga amafilimu akhe ayodlalwa kuthelevishini ukuze aqhakambise indawo yangakubo. Uthe othisha bayameseka kuleli phupho ngoba bayamvumela azoshuthela esikoleni uma kunesidingo. UVusi, owashonelwa unina, unoyise oseNanda angahlali naye.