UChopa usefisa imiqhudelwano emikhulu
USELAMBELE ukudlala emiqhudelwaneni emikhulu neqembu lesizwe laseNingizimu Afrika umdlali osanda kudla isicoco se-Absa Premiership neBidvest Wits uSifiso “Chopa” Hlanti.
UHlathi oyibamba ngakwesokunxele emuva useqenjini leBafana Bafana. NgoMgqibelo elakuleli lizodudulana neNigeria emdlalweni wokuhlungela ukuzibekisela indawo kwiCAF Africa Cup of Nations (Afcon) eseCameroon ngo-2019. Lo mdlalo usekuhambeni ngo-5 ntambama.
Ngemuva kwale midlalo iBafana izodudulana neCape Verde ekuhambeni nasekhaya emidlalweni emibili yokuhlungela ukuzibekisela indawo kwiNdebe yoMhlaba eseRussia ngo-2018.
UHlanti elumana indebe neSolezwe uveze isifiso sakhe sokuyibamba emiqhudelwaneni ehlonishwayo neqembu lesizwe.
“Ngijabule kakhulu ngokubizelwa eqenjini lesizwe. Kuyakhombisa ukuthi kukhona into enhle engiyenzayo. Ngifuna ukubonga iWits ngeqhaza elibambile empumelelweni yami.
“Ukubizwa kwami eqenjini lesizwe kusho ukuthi kumele ngisebenze ngokuphindiwe ukuze ngihehe umqeqeshi (uStuart Baxter) ekutheni angibophele esikimini.
“Njengamanje yima umsebenzi omkhulu uzoqala. Siyazi ukuthi iNigeria esizobhekana nayo asikaze siyishaye emidlalweni yokuhlunga kodwa lokho akusishayisi ngovalo.
“Nathi sifuna ukuyiqala kahle imidlalo yokuhlunga ngokuthola amaphuzu amathathu. Kuyisifiso sanoma yimuphi umdlali ukudlala emiqhudelwaneni emikhulu njenge-Afcon neNdebe yoMhlaba. Nami ngingakuthokozela ukudlala kuyona ngelinye ilanga,” kusho uHlanti.
KwiBafana uzobanga indawo noTebogo Langerman weMamelodi Sundowns. UHlanti akaqali ukubizelwa kwelesizwe. Ngomdlalo wakhe wokuqala kwelesizwe waqokwa njengomdlali ovelele ngesikhathi iBafana ibhekene neCameroon wokokuhlungela i-Afcon.
“Ngicabanga ukuthi sekuyisikhathi manje sokuthi abantu basibone senza izinto ezinhle ezingeni lomhlaba.
“Mina ngiwumuntu ozithandayoke izinselelo futhi into engisizayo wukuzethemba. Ukudlala kwiCAF Champions League kungifundise izinto eziningi. Phakathi kwezinto engizifundile wukuthi amaqembu angaphandle ayasihlonipha. Ahlale ethukile uma sidlala nawo.
“Lokhu ngikubone ngesikhathi sidlala ne-Al Ahly ekhaya nasekuhambeni. Njengoba nathi sihlale sizikhathaza ngabo nabo bayazikhathaza ngathi. Okumqoka wukuthi sidlale ngendlela yethu,” kusho uHlanti.
IBafana ihluleke yancama ukuzibekisela kwi-Afcon ebiseGabon ekuqaleni konyaka. Kulokhu izoqala imidlalo yokuhlunga nomqeqeshi omusha uStuart Baxter.
“Wonke umuntu ubhekene nenselelo yokuziveza ukuthi uphetheni kumqeqeshi omusha weqembu lesizwe. Abanye bethu bazobe beqala ukusebenza naye.
“Sizimisele ngokumsebenzela siphinde sifunde izinto ezintsha kuyena,” kuphetha uHlanti.
IBafana izohamba namuhla isilibangise eNigeria.