Lizobhukulela imidlalo ezayo elaseKZN
UMQEQESHI weKingdom Stars, uMadrilien Maritz, okuyiqembu laKwaZulu-Natal ebeliyibambe kwiBrutal Fruit Netball Premier League uthe ngeke sibe khona isikhathi sokusonga izandla baphumule ngemuva kokuthi belehlisile izinga emqhudelwaneni wakulo nyaka.
IStars ibizibekele okungenani ukugcina indawo yesihlanu abayithole nyakenye kwiligi kodwa kunalokho ukuqala ngezinga eliphansi kwenze yagcina iqede endaweni yesikhombisa.
Ngesikhathi kuqala imidlalo iqembu likaMaritz likuthole kunzima ukuhlangana njengoba like lashaywa imidlalo emithathu ilandelana, okwenze kwanzima ukufica amaqembu angaphezulu kwalo kwi-log ngesikhathi kudlalelwa amaphuzu. Ukuhlangana ekugcineni yikhona okulisizile ukugqiba ihlazo lokungaqedi emsileni njengoba libhudluze iNorthern Cape Diamonds neLimpopo Baobabs emidlalweni yama-Play-Off eBloemfontein ngempelasonto edlule.
“Kuyadumaza ukuthi sehlile sisuka endaweni yesihlanu saya kweyesikhombisa. Yingakho emasontweni amabili ezayo sizobe sesiqala ngamalungiselelo onyaka ozayo,” kusho uMaritz obekungokokuqala ehola iqembu kule midlalo.
Njengamanje sekusele amaqembu amane azoshukana kweyandulela owamanqamu ngoMgqibelo khona eMangaung Indoor Sports Arena, eBloemfontein, bese kuthi ngeSonto kucace ukuthi ngobani omakhonya kowamanqamu.
Amaqembu asesele iGauteng Jaguars ezodlala neWestern Cape Southern Stings kwi-semi final yokuqala ngo-4 ntambama. Kweyesibili kuzobhekana iNorth West Flames neGauteng Fireballs ngo-6 ntambama. Umdlalo wamanqamu ungeSonto ngo-12.30 ntambama.
Amanye amaqembu aqede kanje: 5 - Free State Crinums 6 - Eastern Cape Aloes 7 - Kingdom Stars 8 - Limpopo Baobabs 9 - Mpumalanga Sunbirds 10 - Northern Cape Diamonds