Ithuba lokujabulisa abalandeli kowamaBoks
IMIPHUMELA yangonyaka odlule, lapho amaBhokobhoko enqobe khona kane emidlalweni engu-12, enye yezinto umqeqeshi wawo u-Allister Coetzee okumele asheshe ayikhohlwe njengoba kuqala isizini entsha ngomdlalo wangoMgqibelo neFrance eLoftus Versveld, ePitoli.
Ngemuva komdlalo waseLoftus, amaBhokobhoko azovakashela eThekwini lapho ezophinda khona neFrance ngoJuni 17 eGrowthpoint Kings Park Stadium. Owokugcina uzoba se-Emirates Airline Park, eGoli ngoJuni 24. Yonke le midlalo ingo-5 ntambama.
Lo mqeqeshi uthwale kanzima ngemuva kokuthatha lo msebenzi kuHeyneke Meyer. Ngendlela aqale kabi ngayo abaningi bese beqalile besho ukuthi awumfanele umsebenzi kodwa uqashwe ngoba kuvalwa ihlazo lokugqoza kobuso bebala elimnyama kuleli qembu.
Nokho uCoetzee ubona imidlalo abazoyigijima neFrance izonika yena nabadlali bakhe ithuba lokuyivala yonke le nto ebilokhu ikhulunywa ngesizini edlule. NgokukaCoetzee ukuvakasha kweFrance kufana nokuthi uqala phansi.
“Kuningi okungekuhle okwenzekile. Asikho kodwa isidingo sokukhala ngosekwenzekile ngoba ngeke sisakushintsha ngisho ngabe siyathanda. Esinakho yithuba lokunika abalandeli bethu injabulo ezokwenza bakukhohlwe konke okubi okwenzekile. Ngeneme ngabadlali nangendlela abakhombisa ukuzinikela ngayo ejimini. Ngijabule futhi nangesimo abadlali abazinze phesheya kwezilwandle abafike bekusona. Simi ngomumo. Kukhona izinguquko esizenzile ngenhloso yokuqinisekisa ukuthi okusehlele ngesizini edlule ngeke kuphinde kusithole,” kusho lo mqeqeshi.
Inkinga ebhekene noCoetzee ukulinyalelwa abadlali ngaphambi komdlalo wokuqala neFrance. UDuane Vermeulen noDamian de Allende ngeke babe khona, kanti uLionel Mapoe akwaziwa noma uzoqala yini njengoba edonseke umsipha. Ukulimala kukaVermeulen kuvulela ithuba uSiya Kolisi ukuthi aqala kunombolo 7.
Phambilini uCoetzee kudingeke amukele ukuthi ngeke akwazi ukusebenzisa uLukhanyo Am olimale emdlalweni weSuper Rugby phakathi kweSharks neStormers.