UKadodia ucikwe yiDowns ngomdlali
IMAMELODI Sundowns ihoxise isicelo sokusayinisa umdlali weMaritzburg United uDeolin Mekoa ebifuna ukuvala ngaye isikhala sikaKeagan Dolly ngoJanuwari oshiye Abafana Ba Style wajoyina iMontpellier yaseFrance.
Ezinyangeni ezedlule uFarook Kadodia, ongusihlalo weTeam of Choice, watshela Isolezwe ukuthi iSundowns ifake isicelo sokusayinisa uMekoa oyibamba ngakwesokunxele phambili nasemuva, noma ngemuva kwabagadli.
UMekoa naye waphinde watshela abezindaba ukuthi kuyisifiso sakhe ukudlalela iqembu elikhulu njengeSundowns ngoba iphupho lakhe wukuyodlala kwiCAF Champions League.
UKadodia ubefuna abadlali abathize kwiSundowns bese ededela uMekoa. Nokho izolo lo sihlalo weTeam of Choice utshele leli phephandaba ukuthi simdinile isenzo seSundowns. “Isenzo seSundowns siphambene nemithetho. Bafika kimina bathi bafuna umdlali. Ngamtshela umdlali ukuthi ufunwa yiSundowns wajabula. Kuthe kusenjalo iSundowns yabuya isithi ayisamfuni umdlali. Lokhu kungiphoxile ngoba umdlali ubesenethemba futhi esejabule. Indaba yakhe neSundowns ayisekho,” kusho uKadodia. UMekoa oyibamba ngakwesokunxele, ubeyingxenye yeqembu lesizwe lakuleli ebelidlala kuma-Olympic Games eRio de Janiero, eBrazil, ngonyaka odlule. Kulo mqhudelwano wayidlala yonke imidlalo. Ngemuva kwalokho wabizelwa naseqenjini lesizwe iBafana Bafana.
Elinye iqembu okuke kwavela ukuthi liyamfuna yiKaizer Chiefs ecijwa nguSteve Komphela okunguyena owamnika ithuba lokudlala esigabeni esikhokhelayo.
Kuthintwa uThulani Thuswa wezokuxhumana kwiSundowns ukubeke kwacaca ukuthi akayazi indaba kaMekoa futhi uyaqala ukuzwa ngayo.
Sisekuzo ezithinta iTeam of Choice uKadodia uveze ukuthi basaxoxa noFadlu Davids oyibamba lomqeqeshi.
“Emasontweni amabili ezayo sizobe sesisithathile isinqumo ngekusasa likaFadlu. Inkontileka yokuthi athathe ngokugcwele imfanele kodwa okwamanje sisaxoxa,” kusho uKadodia.
Lo sihlalo uthe kumethusile ukubona imibiko yoku uKurt Lentjies ongukaputeni weqembu usesayine inkontileka neChippa United.
“UKurt unenkontileka nathi kuze kube uJuni 2018,” kusonga uKadodia.
ITeam of Choice izodlala kwiMTN 8 ekuqaleni kwesizini ezayo. Izobhekana neSundowns eqede endaweni yesibili kwi-log.