UKrol angase athathe kwiCape Town City
KUNGENZEKA abuyele kwiPremier Soccer League (PSL) umqeqeshi wodumo lwezicoco kwi-Orlando Pirates, uRuudi Krol, (osesithombeni) njengoba kuvela igama lakhe eqhulwini labangase bathathe izintambo kwiCape Town City eshiywe ngu-Eric Tinkler.
UTinkler umenyezelwe njengomqeqeshi omusha weSuperSport United izolo ntambama njengoba belibikile leli phephandaba. UKrol, owazakhela udumo kwiBucs, usohlwini lwabaqeqeshi abaxoxa nesikhulu seCape Town City uJohn Comitis.
“Yebo, uKrol ukhona ohlwini lwabaqeqeshi esikhuluma nabo. Ezinsukwini eziyisikhombisa kusukela manje sizommemezela umqeqeshi omusha,” kusho uComitis.
UKrol wazakhela igama kwiPirates eqeda ishobolo leminyaka eyisishiyagalombili leli qembu liphuthwa yizicoco. Wathela othulini iMoroka Swallows kowamanqamu weMTN 8 wase equmba phansi iBlack Leopards kwifayineli yeNedbank Cup. UKrol wahlobisa lesi sicoco ngese-Absa Premiership ngemuva kwalokho washiya kweZimnyama.
Ngo-2010/2011 waqokwa njengomqeqeshi ovelele kwiPSL. Njengamanje alikho iqembu aqashwe kulona. Lo mqeqeshi waseHolland kuyimanje useKapa.
Phakathi kwamaqembu aseke wawaqeqesha kulandela ukushiya iPirates kukhona iCS Sfaxien, Club African ne-Esperance yaseTunisia, Al-Ahli SC yaseLibya neRaja Casablanca yaseMorocco. KwiSfaxien udle isicoco seligi ngo-2013. Kuthe kusenjalo wakhala wemuka neseCAF Confederation Cup. Ngo-2012 waphuma endaweni yesibili embangweni wesicoco seligi. Kwi-Esperance uhlabane ngesicoco seligi ngo2014 kwathi ngo-2015 wanqoba eseUNAF Club Cup.
Isolezwe lihabule izindaba zokuthi uGordon Igesund ofake isicelo somsebenzi kwiPlatinum Stars, usifakile esinye isicelo kwiCape Town City. U-Igesund ubheke ukuvala isikhala sikaTinkler nesikaCavin Johnson kuDikwena.
Ngesizini ezayo iCape Town izobe idlala kwiCAF Confederation Cup kulandela ukuqeda endaweni yesithathu kwi-log. Leli qembu liphinde lakhala lemuka nesicoco seTelkom Knockout. Muva nje lisanda kumemezela u-Ayanda Patosi njengomdlali walo omusha.
UPatosi, ongumdlali weBafana Bafana, ubegijima kwiLokeren yaseBelgium.