Injabulo kuPhalula kubuya iwele lakhe
UFUNA ukubingelela ingane kadadewabo ngendondo uLebogang Phalula obheke ukuqeda nabagijimi abathathu bokuqala abazoshaya intambo emlenzeni waseThekwini weSpar Women 10/5km Challenge.
ISpar Women Challenge izoqala ngeSonto ngo-8 ekuseni kuMasabalala Yengwa Avenue uphelele eGrowthpoint Kings Park Stadium, eThekwini. Kuzophinde kube nomjaho ka-5km wabesifazane abafuna ukuzilulela imilenze.
Njengamanje uPhalula ugijima ngaphandle kwewele lakhe uLebo osanda kuthola ingane yakhe yokuqala. Emlenzeni wokuqala obungo-Ephreli eKapa uPhalula ulale endaweni yesine kwathi kowesibili obuseBhayi ngoMeyi wangena endaweni yesihlanu.
“Ngiyajabula ukuthi iwele lami selibuyile. Uma lingekho angikwazi ukugijima kahle. Usebelethile manje futhi bangase bafike bezongibuka nomntwana wakhe u-Olwethu. Yingakho ngifuna ukubajabulisa ngokuthi ngibalwe nabokuqala abathathu abazophuma phambili,” kusho uPhalula.
UPhalula unerekhodi elihle eThekwini kwazise ngo-2014 nango-2015 nguyena odle umhlanganiso emlenzeni waseThekwini.
“ITheku lihambisana nomzimba wami. Ngihlale ngigijima kahle njalo uma ngisendaweni enolwandle. Isikhathi esiningi ngivamise nokushaya izikhathi ezinhle. Ngakho nakulokhu ngibheke ukuthi ngenze kahle. Kumqoka ukuthi ngiqoqe amaphuzu amaningi kule mijaho elandelayo kwazise angizange ngenze kahle emijahweni edlule. Umjaho ngiwulungele. Akukho lapho ngithinteke khona,” kusho uPhalula.
Umlenze wesine uzoba sePitoli ngo-Agasti 5 bese kuthi owesihlanu ubeseMgungundlovu ngo-Agasti 20. Owokugcina uzoba seGoli ngo-Okthoba 8. Umgijimi ozoqeda endaweni yokuqala uzohlabana ngo-R10 000 bese kuthi othathe indawo yesibili agoduke no-R7 500. Oqede endaweni yesithathu uzothola u-R5 000. Umsubathi uzobashaya emakhanda ngemuva kwemilenze eyisithupha uzokhala emuke no-R173 000.