‘Abamnyama abazibhalele imidlalo yeTV’
ABANTU abamnyama kumele kube yibona ababhala ngempilo yabo emidlalweni yethelevishini, isikhathi sokuthi bazibambele mathupha sifikile.
Lokhu kushiwo wuBasetsana Kumalo emcimbini wosomabhizinisi iMzansi Business Forum nalapho achonywe khona uphaphe lwegwalagwala.
Uthe njengamanje uzimisele ngokuvula isiteshi sethelevishini okuzokuba ngesakheesizosiza ekudaleni amathuba omsebenzi.
“Ngiqashe abantu abangu-600 ezinhlelweni zethelevishini engizenzayo, ngiphinde ngibe nabasebenzi abangu-5000 enkampanini yami yezimayini, ngikusho lokhu ukuveza ukuthi uma sizenzela izinto okungezethu singadala amathuba omsebenzi amaningi,” kuchaza uBasetsana.
Isikhulumi sosuku bekunguNgqongqoshe weziMali uMalusi Gigaba othe kumthokozisa kakhulu ukubona osomabhizinisi behlangene ngalolu hlobo. Ukhale kakhulu ngokungaveli kwezinto ezakhayo ezithinta abantu abamnyama kwithelevishini nasemaphephandabeni.
“Uma ubheka ikhasi lesithathu emaphephandabeni uthola umgosi ngabadlali abamnyama abajolayo beshadile, wathi okumxakayo wukuthi abadlali bombhoxo abamhlophe bona abakwenzi yini lokhu okuthiwa kwenziwa abamnyama, wabuza ukuthi kungani kuvezwe imigosi ngabantu abamnyama kuphela ekubeni ziningi kangaka izinto ezinhle abazenzayo,” kubuza uGigaba.
Uphinde waveza ukuthi ungumlandeli weMzansi Magic kodwa uyazibuza ukuthi kungani kutshengiswa abamnyama notokoloshe ekubeni ziningi kangaka izinto ezinhle abazenzayo. Ube esehamba emazwini kaBasetsana okuthi kubalulekile ukuthi abamnyama bazibhalele umlando wabo.
USiya Xulu, weMzansi Business Forum, uthe basazoqhubeka nokuthwesa uphaphe legwalagwala osomabhizinisi abenza kahle. “Siqale singu-9 kodwa manje sinamalungu angaphezulu kuka15 000, uBasetsana uthe usezoba yingxenye yethu, noGigaba uthe uzoseseka, lokhu kuyinto enkulu kuthina,” kuchaza uXulu.
Uthe osomabhizinisi asebethwese uphaphe legwalagwa angabala kubona uLindelani Mkhize, Nto Majozi, Nomfundo Mcoyi, Miles Kubheka, Zanele Mbokazi, Max Lichaba, Calvin Mathibeli, Mjay Zama nabanye.
UXulu uthe basazoya nakwezinye izindawo ezifana nakoMpumalanga nakhona beklomelisa osomabhizinisi abenza kahle.