Kuhlukene imibono ngokuhlolwa kwabafundi abachibiyelayo
KUHLUKENE imibono phakathi kwezinyunyana zothisha ngesiphakamiso soMnyango weMfundo oyiSisekelo sokuthi ukuhlolwa kokuchibiyela kwabafeyile umatric kube ngoJuni nangoNovemba kuphela.
Namuhla uMnyango wezeMfundo kulindeleke ukuthi wenze izethulo phambi kwekomiti lezemfundo ePhalamende ukuveza ukuthi yikuphi osukwenzile ukuzama ukuhlanganisa ukuhlolwa kokuchibiyela kwangoMashi nangoJuni.
Umengameli weNational Teachers’ Union (Natu), uMnuz Allen Thompson, uthe iNatu iyaseseka isiphakamiso kodwa uma sizohambisana noxhaso olwanele.
“Lokhu kuzonika abafundi abafeyilile isikhathi esanele sokuzilungiselela. Ukubhala ngoMashi kusuke kungukuxina abafundi ngoba basuke sebevele bengeke besazithola izikhala zokufunda ezikhungweni zemfundo ephakeme,” kusho uThompson.
Uthe nakuba beseseka kodwa zikhona izinto ezidinga ukuqikelelwa kuso, wathi ngoLwesithathu bazohlangana naboMnyango wezeMfundo ukubhunga isiphakamiso.
“Uma umfundi kade ebhala ngoNovemba, kuba lula ukuthi asheshe akhumbule uma ezosheshe abhale. Abafundi ababhalisele ukubhala lolu hlobo lwezivivinyo abekho esibalweni sabafunda ngokugcwele, ngakho umnyango kumele uqhamuke nezinhlelo zokukhokhela othisha abazosebenza amahora angeziwe njengoba kuzomele kube namakilasi antambama ukulekelela abafundi,” kuqhuba uThompson.
UNobhala weSouth African Democratic Teachers’ Union (Sadtu), uNksz Nomarashiya Caluza, uthe isiphakamiso ngeke senze mehluko uma lungekho uhlelo olucacile lokusiza abafundi.
“ISadtu ikholwa wukuthi ngaphambi kokuba kwenziwe isiphakamiso bekumele kuqale kulalelwe imibono yomphakathi emazingeni aphansi. Asikwazi ukubuka umnyango ushintsha imithetho ngaphandle kwemibono yabantu ngoba imfundo ngeyokwenza ngcono impilo yabo.”
Inhlangano yabafundi, iCongress of South African Students (Cosas) isincomile isiphakamiso.
USihlalo wayo kulesi sifundazwe, uSiyabonga Phakathi, uthe lokhu kuzonika abafundi abangaphumelelanga ithuba elanene lokulungiselela ukuhlolwa kwabo.
“Uma ubheka izibalo zabafundi abafeyilayo uma behlolelwa ukuchibiyela, zilokhu zenyukille kusuka ngo-2007. Akuwenzi umqondo ukuthi umuntu afeyile ngoNovemba, kudlule izinyanga ezimbili useyabhala futhi, bese kulindelwa ukuthi aphumelele. ICosas KwaZulu-Natal iyaseseka isiphakamiso,” kusho uPhakathi.
Phambilini ukubhalelela ukuchibiyela kwabafeyile umatric bekuba ngoMashi, ngoJuni nangoNovemba kodwa isiphakamiso sithi kumele kubhalwe ngoJuni nangoNovemba.
Kuthintwa okhulumela umnyango kuzwelonke, uMnuz Elijah Mhlanga, unqabile ukuphawula ngalolu daba. Ucele ukuthi kulindwe kuze kube udaba ludingidwa ePhalamende kuqala. UMhlanga uthe bazothumela isitatimende namuhla.