Osaziwayo emkhankasweni wokusoka
BAZOGQUGQUZELA umphakathi ngokusokwa osaziwayo bakuleli, abayingxenye yomkhankaso ohambisana nenyanga yezempilo kwabesilisa.
Osaziwayo abakhethwe ngenxa yogazi lwabo emphakathini, bangamanxusa omkhankaso owenziwa yiCommunity Media Trust (CMT) obizwa ngeMan Up, ukukhuthaza ukuzinakekela kwabesilisa.
Kulabo saziwayo kukhona uKhaya Mthethwa ongumculi futhi ongumethuli wezinhlelo zethelevishini, abalingisi okunguLuthuli Dlamini, uChad Saaiman, Christian Bennet, Lemogang Tsipa, uBrighton Ngoma odlala kwiScandal, uKatleho Sinivasin, Wandile Molebatsi, Obed Baloyi we-7de Laan, Sekoati Tsubane noMatli Mohapeloa onguDJ Ngwazi kwiRhythm City.
UNksz Lucilla Blankenberg ongumqondisi weCMT, uthe bakhethe labo saziwayo ngoba abanye babo sebesokile futhi nomphakathi ubukela kubona.
Uthe lo mkhankaso uzosiza ukulwa nokubhebhetheka kwegciwane lengculazi, izifo ezithathelana ngokocansi nomdlavuza wabesilisa.
“Abesilisa nabo bayahlaselwa izifo, umdlavuza yiwona ohamba phambili kwabakuleli. Ukusokwa sekubonakele ukuthi kungavikela abesilisa kwezinye izifo, ngakho akumele bakusabe,” kuchaza uNksz Blankenberg.
Ebuzwa ukuthi bakhethwe kanjani labo saziwayo, uNksz Blankenberg uthe bebebheke abazohambelana nabesilisa ababafuna ukubaheha, abaneminyaka ephakathi kuka-15 no-34.
“Lo mkhankaso uzoqhubeka sisebenzisa osaziwayo njengoba ngo-Agasti sizothatha abesifazane abaseka abesilisa ngokusokwa. Sizohambela amarenki neminye imicimbi ezohlanganisa abesilisa, esithemba ukuthi namanxusa ethu azoba khona kweminye yize ematasa ngokomsebenzi.”
Lo mkhankaso uzoqhutshwa nangezikhangiso ezahlukene emisakazweni nakwithelevishini.
UKhaya uthe okwenze awusukumele lo mkhankaso ukuthi ufuna bonke abesilisa baphile kangcono.
“Igciwane lengculazi liyinkinga kuleli, akumele sihlale singenzi lutho ngalo. Lo mkhankaso uzosiza ukuzama ukunciphisa ukwanda kwegciwane,” kusho uKhaya.
UWandile uthe: “Kumele sikhulume ngokukhululeka ngokubaluleka kokusoka, nokuhle okuwumphumela kwakho. Ziningi izinkolelo ze ngokusokwa, okumele siqinisekise ukuthi ziyaphela emphakathini.”
U-Obed obuye abe ngusomahlaya owazakhele udumo emdlalweni iGa Re Dumeli ku-SABC2, uphumele obala wathi usesokile. Uthe wakhuthazwa umngani wakhe ukuthi asoke.
“Umngani wami wayengincomela ukuthi sekumhambela kahle kakhulu ekamelweni emuva kokusokwa. Nami ngibone ukuthi ukusoka kusiza kakhulu kwezempilo yabesilisa,” kusho u-Obed.