Besule izinyembezi zabalandeli babo
ZIGCINE ziyivumile izinto iJaguars engompetha abasha beBrutal Fruit Netball Premier League ngemuva kokwehlulwa emidlalweni emithathu yamanqamu iminyaka ilandelana.
IJaguars yaseGauteng ihlule iNorth West Flames ngo 49-43 kowamanqamu eMangaung Indoor Stadium, eBloemfontein, ngeSonto ntambama.
Bezithengana kulo mdlalo. IJaguars ihambe phambili kuqala kodwa kwikota yesibili iFlames yabuya kwagcina kuyiyona esiphambili.
Ngesikhathi iFlames ihamba phambili ngamagoli amathathu, iJaguars iphendule ngamathathu asheshayo amaqembu agcina elingana ngo 14-14. Kusukela lapho iJaguars ayibange isabheka emuva.
Umqeqeshi weJaguars, uJenny van Dyk, uthe ngemuva kokwehlulwa kathathu kweyamanqamu bese bazi ukuthi kulokhu kumele benze izinto ngendlela ehlukile.
“Bekuyimpi lena. Umdlalo wethu wesine wamanqamu, bekunzima ukuhlulwa. Ngemuva kokuthi sihlulwe okwesithathu sizitshelile ukuthi kumele senze izinto ngendlela ehlukile ukuze sithole lo mphumela,” kusho uVan Dyk.
UDorette Badenhorst opheka iFlames uthe yize kubuhlungu ukukhala ngaphansi kodwa uyaziqhenya ngeqembu lakhe.
“Akukho engingathi asikwenzanga kahle kulo mdlalo, bebeyiqembu elingcono kunathi. Ngiyaziqhenya ngabadlali bami ngokulokhu besekana umqhudelwano wonke. Okuhle wukuthi siqede endaweni engcono kunesiyithole nyakenye lapho siqede khona endaweni yesine,” kusho uBadenhorst.
Njengompetha iJaguars izothola ithuba lokuyodlala kuSuper Cup eNew Zealand okuwumqhudelwano odlalwa amaqembu amakhulu kuleli lizwe eliyazisayo i-netball. Izohamba ngoJuni 29.