UBaxter ubona ingozi kwiSafa
UMQEQESHI weBafana Bafana, uStuart Baxter, ubona ubungozi endleleni iSouth African Football Association (Safa) eyenze ngayo ekuhleleni umdlalo wobungani neZambia namuhla ngo-7 ebusuku eMoruleng Stadium, eRusternburg.
IBafana iya kulo mdlalo neZambia ihambela phezulu kwazise yenze okungakaze kwenziwe yileli qembu lesizwe emlandweni, ukunqoba kwiNigeria idlalela ezweni layo. IBafana inqobe ngo 2-0 wamagoli kaTokelo Rantie noPercy Tau e-Uyo, eNigeria, kowokuhlungela i-Africa Cup of Nations (Afcon) ezokuba seCameroon ngo-2019.
UBaxter ukhala nje yingoba leli qembu lesizwe litheleke kuleli izolo ekuseni langena ebhasini ebheke ePhokeng lapho beliyoqala khona amalungiselelo alo mdlalo. Akuyena uBaxter kuphela okhala ngalokhu kepha nabadlali bayakhononda. Ngaphandle kwabo abadlali uBaxter ubona lokhu kungathuntubeza nobudlelwano azama ukubakha namaqembu adlalelwa abadlali asebenza ngabo eqenjini lesizwe. “Ngikanye nabo abadlali nami kodwa-ke akukho engingakwenza. Ngikwazi kahle engakuvuma ngithatha lo msebenzi kanti nabadlali bayakwazi okulindeleke kubona. Akulula khona ukubuya eNigeria ngoMsombuluko bese kuthi ngemuva kwamahora angu-24 usuyadlala futhi. Bengingeke ngikuvume lokhu ukube izinto bezenzeka ngendlela yami kodwa-ke akunjalo. “Okungixaka kakhulu ukuthi bekuzokwenziwa kanjani ukube isizini ibingavaliwe. Phela abadlali bazobuyela emaqenjini abo sekudlule isikhathi ngenxa yalo mdlalo weZamiba. Abezothini amaqembu alaba badlali ukube ngempela isizini ivulile? Lokhu ngikubona kungaba yingozi esikhathini esizayo ngoba nokuxhumana kwethu nobudlelwano esizama ukubakha namaqembu adlalelwa abadlali beBafana bungaphazamiseka,” kusho uBaxter.
Nakuba ebhekene nalokhu uBaxter uthe lo mdlalo uzowusebenzisa ukubona kahle abadlali abafana no-Abbubaker Mobara, Tau, Lorenzo Gordinho, Lebohang Manyama, Aubrey Ngoma, Sifiso Hlanti nabo bonke abangazange badlale eNigeria ngenxa yezizathu ezahlukene.
“Ngiyaqonda ukuthi ukunqoba kumqoka kodwa asikho isidingo sokulwela lokho noma sinethuba lokubuka abadlali esizobe sigadla ngabo kusasa. Lesi sinqumo ngisithathe ngazi kahle ukuthi ngizogxekwa kangakanani uma kwenzeka sihlulwa yiZambia ngodwa ngeke ngisishintshe,” kuphetha uBaxter.