Ziyaqina ezokuthi uBenni uya kwiCity
USIHLALO weCape Town City, uJohn Comitis, kungenzeka anike enye ingwazi yeBafana Bafana ithuba lokuzibonakalisa njengomqeqeshi njengoba ziqina izinsolo zokuthi useqede konke noBenni McCarthy osanda kuthola izicucu zakhe zokuqeqesha phesheya kwezilwandle.
UComitis umatasa ufuna umqeqeshi ozothatha izintambo ngemuva kokushiywa ngu-Eric Tinkler ngesonto eledlule.
UTinkler umenyezelwe njengomqeqeshi omusha weSuperSport United eshiywe wuStuart Baxter. Izolo uComitis uvumile ukuthi uMcCarthy ngomunye wabafake izicelo zokuqeqesha iCity. Ngesizini edlule uComitis unikeze uTinkler, owayeyibamba kwiBafana, umsebenzi wokupheka iqembu lakhe ngemuva kokubizwa ngevukana kwi-Orlando Pirates aqale kuyona njengephini likaRoger De Sa ngaphambi kokuthi athathe izintambo ngokugcwele.
KwiCity ufike wanqoba iTelkom Knockout wase eyibeka endaweni yesithathu kwi-log.
“Ngiyabezwa nje abantu sebengihambela phambili ngokuthi sengimqashile umqeqeshi. Angikaqedi, kumanje ngikhuluma nawe nje ngisaya kwenye inhlolokhono nomunye wabafake isicelo. UBenni McCarthy ngomunye wesixoxisana nabo. Engingakusho nje wukuthi kuzophela usuku lwanamuhla (izolo) sesisithathile isinqumo,” kusho uComitis izolo emini.
Izolo ntambama iCity idalule ukuthi uzomenyezelwa namuhla ngo-11 ekuseni umqeqeshi.
Ngesonto eledlule uvumile ukuthi bakhuluma nanoRudi Krol.
Ngokuthola kweSolezwe ngemithombo ezaziyo ezenzeka emakhosombeni kunobhutshuzwayo uMcCarthy usevele usewutholile umsebenzi wokupheka iCity. “Uyena Benni,” kube yimpendulo ekhishwe ngumthombo uma ubuzwa ukuthi ngabe kuyiqiniso ukuthi uMcCarthy usewudlile umhlanganiso. Omunye ophethe abadlali nabaqeqeshi leli phephandaba elikhulume naye, uthe: “Bengifakele nowami umqeqeshi isicelo kodwa abazange babuyele kimina. Ngeke ngimangale uma kuwukuthi sebeqashe yena uBenni ngoba uComitis ungumuntu okukhonzile ukunika abantu abasebasha ithuba.”
UMcCarthy ongomunye wabadlali abanerekhodi elihle njengomgadli eqenjini lesizwe iBafana, uthole izicucu zokuqeqesha ze-Uefa A Licence ngoJanuwari azenze e-Ireland.
Useke wasebenza noComitis phambilini ngezikhathi ze-Ajax Cape Town, ngaphambi kokudlulela phesheya lapho efike wanqoba isicoco se-Uefa Champions League neFC Porto. Lokhu kumenza ukuphela komdlali waseNingizimu Afrika ukunqoba lesi sicoco. Ngaphambi kokuthatha umhlalaphansi ngo-2013 usize i-Orlando Pirates inqoba izicoco ezintathu okuhlanganisa neseligi.