Kuboshwe amaphoyisa asolwa ngenkohlakalo
KUBOSHWE amaphoyisa amathathu asolwa ngenkohlakalo yokuntshontshwa kwezimoto zakuleli zeqiswe emngceleni wakuleli neMozambique.
La maphoyisa aboshwe wuphiko lwamaphoyisa alwa nenkohlakalo emngceleni ngoMsombuluko.
UNgqongqoshe wezokuPhepha KwaZulu-Natal uMnuz Mxolisi Kaunda, uthe iNingizimu Afrika iyizwe elinomthetho, ngeke bakuvumele ukuthi kube nabantu abenza noma ikanjani kulo ngoba besezikhundleni. “Wonke umuntu ophula umthetho uzoboshwa ajeziswe. Asinandaba ukuthi ungubani, unebala elinjani.”
UKaunda ubesho lokhu ngesikhathi kwethulwa ngokusemthethweni isiteshi samaphoyisa esingumahamba nendlwana KwaSkhemelele, eMkhanyakude, izolo.
Lokhu kulandela ukuvakashela kukaMengameli uMnuz Jacob Zuma wakuleli kuleya ndawo.
Uthe aseyisikhombisa amaphoyisa aseboshwe eKosi Bay ngezinsolo zokubandakanyeka emkhonyovini wokweqisa izimoto ezintshontshwe esewonke amaphoyisa aboshwe kule ndawo ngezinsolo ezifanayo angu-14.
Uqhube wathi kubanjwe nabanye abasolwa abebephethe izidakamizwa ezingabiza uR140 million kukholakala ukuthi beziya eGauteng naseMozambique.
“Sijabule kakhulu ngenqubekela phambili eseyenzekile kusukela kufike umengameli kule ndawo. Ziyisikhombisa izimoto ezitholakele ebezintshontshwe kule ndawo neziyisishayalombili ebezintshontshwe oPhongolo. Sizoqhubeka sibophe amanye amaphoyisa abandakanyeka ezigamekweni zobugebengu,” kusho uKaunda.
Ukwethulwa kwesiteshi samaphoyisa KwaSkhemelele kuyingxenye yokuthuthukiswa kwesiteshi saseManguzi esizolungiswa ngoR9 million.
Indawo yaKwaSkhemelele kuthiwa iyona ebisetshenziswa kakhulu ukweqisa izimoto ziye eMozambique.
UMntwana uJoseph Tembe oyinduna kule ndawo uthe bakujabulele kakhulu ukuthi umnyango ulethe isiteshi esingumahamba nendlwana.
“UNgqongqoshe usheshe walusukumela udaba lwethu ebese kunesikhathi sikhala ngalo. Sibonga kakhulu nangokuboshwa kwamaphoyisa athintekayo kulo mkhonyovu. Lokhu sekuzokwenza ukuthi kube lula nakithina siwumphakathi ukuthi uma sinolwazi esilutholile siludlulisele kuwona.”