I-ANCYL ifuna onobhala abathathu
I-ANCYL isiphakamise ukuthi uKhongolose ube nonobhala abathathu njengoba ithi ifuna kukhethwe amaphini kanobhala amabili okhethweni bobuholi ngoDisemba.
Lolu phiko lwentsha lusho kanje izolo esithangamini sabezindaba lapho limemezele khona ngokusemthethweni ukuthi lweseka uDkt Nkosazana Dlamini Zuma ukuthi kube nguyena ongena esukhundleni sikaMengameli Jacob Zuma.
I-ANCYL ithe uNobhalaJikelele kufanele kube uNdunankulu waseFree State uMnuz Ace Magashule bese esekelwa nguNkk Jessie Duarte noMnuz Fikile Mbalula, omunye uzoba yiPhini lokuqala omunye abe elesibili.
Lolu phiko wuhlaka lwesithathu lwe-ANC ukuphumela obala ngokuseka uDkt Dlamini Zuma lulandela i-ANCWL ne-MKMVA.
UDkt Dlamini Zuma ubanga lesi sikhundla nePhini likaMengameli uMnuz Cyril Ramaphosa yena osekwa amadlelandawonye kaKhongolose, i-Cosatu ne-SACP.
UNobhala-Jikelele we-ANCYL uMnuz Njabulo Nzuza umemezele amagama esigungu esiphezulu alabo abafisa bahole i-ANC ngemuva kwengqungquthela kaDisemba.
UNzuza uthe bafuna uNdunankulu waseMpumalanga uMnuz David Mabuza ukuthi abe yiPhini likaDkt Dlamini Zuma, kuthiwa uSihlalo kaZwelonke kube uMnuz Nathi Mthethwa.
UNkk Nkoana MaiteMashabane kuthiwa uzoqokelwa esikhundleni sikaMgcinimafaJikelele.
UNzuza ukubeke kwacaca ukuthi umengameli abazomkhetha kumele azibophezele ohlelweni lokuguqula izisekelo zomnotho aphinde eseke uhlelo lokuthathwa komhlaba ngaphandle kwezinxephezelo.
Uthe uphiko lwabo luzibophezele ekuvikeleni abaholi be-ANC kulabo ababahlaselayo.
UNzuza uthe bazishaya isifuba njengo phiko lwentsha kaKhongolose ngokuqhamuka nezinhlelo ezihlose ukushintsha impilo yabantu abasha.
Uthe isigungu sabo sizokhunjulwa ngokuthi yisona esiphoqe ukuthi u-40% wamathenda akhishwa nguhulumeni unikezwe intsha.
UNzuza uphinde wakhwela wadilika kwabezindaba mayelana nodaba lwama-emails adume nge#GuptaLeaks wathi babika ngawo ngathi ayiqiniso.
Uthe ngokwabo la ma-emails angombombayi.