‘Iyazisholo nje i-EFF uma ithi izohlukana ne-DA’
UMHOLI we-EFF, uMnuz Julius Malema, usabisa ngenyoka efile uma ethi inhlangano yakhe izophuma emshadweni wayo ne-DA uma engaxoshwa uNkk Helen Zille njengoNdunankulu waseWestern Cape.
Lona ngumbono womhlaziyi wezepolitiki ozimele KwaZulu-Natal, uMnuz Protas Madlala, ngemuva kokuthi i-DA ingamxoshanga uNkk Zille kwesikaNdunankulu phezu kwesililo emphakathini mayelana nombhalo wakhe ku-twitter lapho athi khona kukhona okuhle okwenziwa ngamakoloni.
“Uzokhumbula ukuthi i-EFF isho kanje nangesikhathi kuphunywa okhethweni lwezindawo ithi izoyiseka i-DA eMkhandlwini waseJohannesburg inqobo nje uma ingeke ifake uMnuz Herman Mashaba kwesobuMeya. Kodwa i-DA imfakile uMashaba phezu kokwesabisa kwe-EFF. I-DA igcine yehlele ngezansi. Ngicabanga ukuthi namanje izithusela ngenyoka efile,” kusho uMadlala.
Imizamo yokuthola okhulumela i-EFF, uMnuz Mbuyiseni Ndlozi, izolo ayiphumelelanga. Ucingo lwakhe belukhala lungabanjwa. Nomyalezo athunyelwe wona akazange awuphendule kuze kwashaya isikhathi sokushicilela.
UNobhala-jikelele we-EFF, uMnuz Godrich Gardee, yena wale waphetha ukuphawula wathi akuthintwe uNdlozi.
I-ANCYL KwaZulu-Natal izolo iphonsele i-EFF inselelo yayinxusa ukuthi ayilaxaze ukweseka i-DA ngemuva kokungakhishwa kukaNkk Zille esikhundleni sikaNdunankulu.
UNobhala we-ANCYL KwaZuluNatal, uMnuz Thanduxolo Sabelo, uthe badumele kodwa kasibethusi isinqumo se-DA sokungamjezisi uNkk Zille ngokumkhomba indlela.
“I-ANCYL iyaqonda ukuthi i-DA ifinyelele esivumelwaneni sokuthi uNkk Zille akenze nje isixoliso esizweni ukuze agcine isikhundla sakhe sokuba nguNdunankulu,’’ kusho uSabelo.
USabelo unxuse uMalema neqembu lakhe ukuba bayeke ukweseka i-DA ukuze bakhombise ukuthi kabalawulwa abelungu.
“I-EFF inethuba lokuthi ihoxise ukweseka kwayo i-DA. Konke kulele koMalema ukuthi bakhombise isizwe ukuthi baluhlobo luni,” usho kanje.
UNkk Zille uxolisile esizweni wathi useyabona ukuthi umbhalo wakhe wathunaza abantu abathile. Uphinde waxolisa ngokubukela phansi umholi wabo, uMnuz Mmusi Maimane.
“Ngiyaqonda ukuthi umbhalo wami wavula izilonda ezindala ezadalwa ngamakoloni. Ngalokho ngiyaxolisa,” kusho uNkk Zille.