Ingenisile kwabamnyama iYoga
ISINGENISE nakwabamnyama iYoga okuyindlela yokwelula nokuvocavoca umzimba esetshenziswa kakhulu ngamaHindu namaBuddhist.
Iyoga, abanye abayisebenzisela ukukhulula imicabango yabo, isiphenduke indlela yokuzivocavoca nokwehlisa isisindo. Abanye bathi iyashesha ukwenza umehluko emzimbeni.
Ukukhula kwesasasa leYoga sekwenze ukuthi amazwe amaningi angenelele ekugubheni i-International Yoga Day ngoJuni 21. IZimbabwe yizwe okuthiwa selinabalandeli abaningi abathanda iYoga e-Afrika kanti nayo izogubha lolu suku. Kuthiwa eZimbabwe sekuhlongozwa nokuthi ifundiswe nasezikoleni iYoga ngenxa yokukhula kwesasasa.
URajan Zed wamaHindu onguMengameli we-Universal Society of Hinduism uchaza iYoga njengomkhuba okhulula umzimba nomqondo.
“Yize yaqala kumaHindu kodwa ingeyawo wonke umuntu ngoba inezithelo ezinhle nakwezempilo,” kusho uZed.
Ucwaningo olwenziwe yi-US National Institutes of Health ngonyaka odlule luveze ukuthi bangaphezulu kuka-37 million asebengenise kwiYoga okubalwa nosaziwayo. Kuthiwa okwenza ibe nedumela wukuthi yenza abantu bakhululeke, kuphefumuleke kalula, umzimba ube lula futhi iqeda nokhwantalala.
Omunye owaziwa ngokuba umlandeli wokuqina weYoga kuleli nguNksz Ndileka Mandela ongumzukulu kaDkt Nelson Mandela.
Engxoxweni yakamuva neSolezwe waveza ukuthi iYoga wayiqala eminyakeni eyisikhombisa edlule futhi akasaziboni ephila ngaphandle kwayo. Uthe selokhu ayiqala wakuyeka nokujima ngoba yona ubona inezithelo kakhulu.
UNksz Mandela, othe iYoga imenza akhulule umqondo kusabalale nemicabango, uthe yenza izimanga ezimbeni njengoba engesabi nokugqoka izimpahla eziveza umzimba ngenxa yokwakheka kahle kwawo okudalwa yiYoga.
Sekukhona amakilasi enzisa iYoga njengoba kwenziwa ejimini. Okuhle ngayo wukuthi ungayenza ngisho endlini kodwa idinga indawo eshisayo ukuze ujuluke kahle. Ziningi izitayela zeYoga ongazenzela zona ekhaya ngoba zonke zihambisana nokwelula amalunga omzimba.
Amanye amathiphu okwenza iYoga:
Udinga indawo evulekile, ethule noma udlale umculo opholile ukuze ingqondo ikhululeke.
IYoga ungayenza wedwa noma niyiqoqo futhi ayikhethi minyaka yobudala.
Qinisekisa ukuthi umzimba nomqondo kukhululekile ngaphambi kokuqala iYoga uqale ngezitayela ezilula.
Phefumula ubambe umoya ubuye uwudedele kunoma yisiphi isitayela osenzayo.
Gqoka izingubo ezizokukhulula zikwenze wenze zonke izitayela ngokukhululeka. Izitayela ezilula zeYoga 1.Yima uqonde izandla uzibhekise phezulu, ukhece isisu.
2. Lala ngesisu uqondile bese uphakamisa isifuba nekhanda, ubambelele ngezandla phansi.
3. Yima uqonde welule umlenze owodwa ngaphambili, izandla uzilulele emaceleni sakundiza. Shintshanisa izinyawo ungakhohlwa wukuphefumula.
4. Lala ngomhlane bese uphakamisa esingezansi, imilenze ibe semoyeni unganyakazi imizuzu eyisihlanu.
5. Hlala phansi ugoqe izinyawo, izandla uzikhangezise phezulu. Kwenze lokhu imizuzuwana ucimezile.
6. Qoshama emoyeni izandla uzilulele maqondana nesisu ziqonde phambili.
7. Bambelela ngezindololwane phansi uqondise umzimba, obhozo uzimelele ngabo phansi.
7. Ungaphindaphinda lezi zitayela uma umzimba usujwayele udlulele kwezinye ezilukhuni.