Bakhala ngezinja zabo eziluma omakhelwane
UMNDENI wakwaGcabashe KwaMaphumulo ukhala ngezinja zawo ezihlalise lubhojozi omakhelwane. Lezi zinja kuthiwa sezilume omakhelwane ababili, owesithathu wephuka ingalo ebaleka ngesikhathi zimjaha.
UNksz Nonhlanhla Gcabashe uthe ngempelasonto lezi zinja zilume itshitshi ebelidlula ngendlela liphuma emfundelweni komunye umakhelwane. “Okusimangazile wukuthi azikhonkothanga, zivele zayiluma ingane, sizwe isikhala ubumayemaye. Kumanje isesibhedlela ilimele kanzima ezinqeni. Sesesaba ukuthi zingaze zibulale umuntu. Sike sacabanga ukuthi sizibulale kodwa kwabuye kwafika ukuthi kungcono sicele usizo lokuthi zithathwe ziyogcinwa lapho kugcinwa khona izilwane.”
Uthe lezi zinja zinhlanu kodwa ezimbili zazihambela zayohlala komunye umakhelwane.
Ezine uthe yizinja ezijwayelekile zasemakhaya, eyodwa ngeyokuzingela kodwa ayizingeli ngoba akekho ohamba nayo ayozingela.
Uthe zathengwa nguyise ongasekho enzela ukuthi bezwe uma kukhona umuntu ofuna ukungena egcekeni kodwa manje abasazifuni ngoba seziyingozi.
“Sesesaba nokuthi zizojikela nezingane zethu. Asazi noma zingenwe yiwo amarabi esike sizwe kuthiwa zenza ukuthi zishintshe. Bezihlale zijovwa njalo uma kufike abomnyango kulo nyaka bebengakafiki. Asinayo imali yokuzihambisa kudokotela sicela ukuthi inhlangano yezilwane isisize izithathe.”
UMnuz Mlungisi Sibiya wenhlangano evikela izilwane iSociety for the Prevention of Cruelty in Animals (SPCA) eMgungundlovu uthe uma izinja sezikulesi simo akulula ukuthi zibuyele esimeni sazo esidala.
“Ngicela ukuthi umndeni izinja uzilethe noma kumuphi uSPCA oseduze. Ungazami ukuzibulala ngoba uzosuke ukwenze lokho ngendlela enesihluku,” kusho uSibiya.