Kwezezimboni lubalulekile ulwazi ngemali nezimakethe
SIKHULA NGOMNOTHO
IZIMBONI ziwumgogodla womnotho wezwe ngenxa yeqhaza ekudaleni amathuba omsebenzi nokuhwebelana namanye amazwe. Azigcini nje ngokuqasha abantu abaningi kodwa zivula amathuba amabhizinisi amancane ziphinde zihehe abatshali zimali bakwamanye amazwe. Ukukhula kwezimboni kubalulekile ekukhuliseni umnotho okungaletha le nkululeko yezomnotho ekukhulunywa ngayo.
Igama losozimboni abamnyama lisematheni kulezi zinsuku njengoba uhulumeni ehlela ukuguqula umnotho uvune bonke abantu ikakhulukazi labo abebecindezelwe. Leli gxathu likahulumeni liyancomeka kodwa mkhulu umsebenzi okufanele wenziwe ukuze liphumelele. Zimbili izinto eziyisisekelo ekusunguleni nasekuphatheni izimboni; ulwazi lwemikhiqizo nokuphatha ibhizinisi kanye nemali yokukhokhela izidingo zebhizinisi. Phakathi kolwazi nemali cishe ulwazi yilona olunomthelela omkhulu ekuphumeleleni. Eqinisweni ukuthola imali yokusungula nokuqhuba imboni kuncike olwazini kwezezimali. Ezingeni lezimboni imali ayiphumi ephaketheni lomuntu oyedwa kepha osomabhizinisi bahlanganisa imali kanti enye itholakala emabhange nakubatshali zimali.
Kuphinde kudingeke nolwazi lwezimakethe zomhlaba ukuthengisa imikhiqizo yezimboni. Akulona nje ulwazi lwezimakethe kuphela oludingekayo, ubudlelwane ezingeni lomhlaba kudlala enkulu indima. Ngakho-ke ukusungula izimboni zabamnyama kuncike olwazini abanalo ekukhiqizeni, ekuphatheni amabhizinisi amakhulu, ezezimali nezimakethe zamazwe.
Umbuzo wokuqala-ke ukuthi lungakanani ulwazi esinalo ngokusungula nokuphatha izimboni? Owesibili ukuthi basithemba kangakanani abatshali zimali bamazwe kanye namabhange? Okwesithathu ukuthi sikulungele kangakanani ukulwela isabelo ezimakethe ekhaya nakwamanye amazwe? Elinye iqiniso okufanele sibhekane nalo ukuthi ngeke kube lula ukwephuca iqatha emlonyeni yalabo abaphethe umnotho njengamanje. Kofanele sijule ngamasu esizowasebenzisa, sizibuze ukuthi kunamthelela muni ukubambisana nalabo abaphethe umnotho wezwe manje. Ngakolunye uhlangothi kufanele sibheke ezinkalweni sixhumane namanye amazwe ukuze sihehe abatshali zimali sivule nezimakethe. Nalapho kufanele sinyathele ngokucophelela singathuki sesithengise umnotho wethu kwamanye amazwe.
Noma bekhona njengamanje abantu abangathatha la mathuba kodwa abenele. Sidinga izindlela zokuthuthukisa ukucijwa kwamakhono silungiselele ikusasa. Lokhu kusho ukuthi kufanele sishintshe ukwenza kwezemfundo ezikoleni zabantu abamnyama. Ngaphandle kwemfundo engcono imizamo yosozimboni abamnyama iyoba yize leze.
Sidinga abafundi abaningi kwezobuchwepheshe, ezezimali, ukuphathwa kwamabhizinisi nezomnotho. Ukuthuthuka kwemfundo ngeke kugcine nje ngokuqinisekisa amakhono kodwa kuyonika ithemba kubatshali zimali nezimakethe. Ngeke kusisize ngalutho ukudayisa amazambane uma wonke umuntu etshale amazambane. Ngokufanayo ngeke sithole lutho ngokukhiqiza uma singenayo indlela yokufikelela ezimakethe.
Kungakuhle ukuthi amabhizinisi amancane ahlomule ekuphakeleni izimboni nasekusatshalalisweni kwemikhiqizo. Asithi sakha izimboni zabamnyama sibe siqondanisa nokuthuthukisa amabhizinisi amancane ukuze alungele imisebenzi eyahlukene ezimbonini.
Ngike ngabeka ukuthi kufanele siphenyisise amasu okusebenzisana nalabo abaphethe umnotho njengamanje. Uma sibuka umsebenzi okufanele wenziwe namakhona adingekayo kuyosisiza ukungabakhiphi inyumbazana abebala. Kunalokho kufanele sisebenzise ubuhlakani ekuqinisekiseni ukuthi ubudlelwane nabebala buvuna thina ekugcineni.
Kungenjalo kuyosithatha iskhathi eside kakhulu ukuthuthuka siyofika ezingeni lomhlaba.
Inkulu kakhulu inzuzo yokusebenzisana kunokungasebenzisani. Amazwe afana no China neJapan aqala asebenzisa lokhu kubambisana ukuze akhule abe yilezi zikhondlakhondla ayizo manje kwezomnotho.
Uma sikhetha ukungabambisani kufanele silindele ukudonsisana okuyothatha isikhathi eside kungekho ozuzayo. Akuyona indlela esifuna ukuyihamba leyo. Singakubekezelela ukwabelana manje ukuze sifunde izindlela zokuphatha izimboni nokuthola izimakethe. Kodwa lokho kwabelana kufanele kuvune abamnyama.
Sesingabuyekeza ubudlelwane ngokuhamba kwesikhathi uma sesinokuzethemba nolwazi ngezimakethe. Inqobo nje ukuthi sifake ikhanda. Hheshe!
Sithinte kule email address umnotho@ ubuntuwealth.co.za noma usishayele ku-031 829 5820.