Kumele kulungiswe umonakalo oshiywe nguMotsoeneng
ITHEMBA alilahlwa, sisho njalo isiZulu. ElangoMsombuluko lishone umuntu enethemba lokuthi cishe izinto zizogcina zilungile enhlanganweni yokusakaza, i-SABC njengoba ibhodi elikhona njengamanje selimxoshile uMnuz Hlaudi Motsoeneng.
UMotsoeneng obeyiChief Operations Officer yase-SABC ubesephendule le nhlangano isidleke sombuso wakhe. Abasebenza e-SABC bathi uMotsoeneng ubengundlovukayiphikiswa, engenendaba nokuthi isinqumo asithathile sisemthethweni noma cha, uma esenqumile, akekho obengasishintsha. Yingakho abanye abasebenzi bese bekusebenzisa lokhu ngoba kuthiwa ubukwazi ngisho ukumcela akunyusele imali nisemhlanganweni ongukhukhulela ngoqo, ubengabonisani namuntu, ubevele akhiphe umyalelo wokuthi khushulelwa imali, angabheki nokuthi wumvuzo okufanele yini lowo. UMotsoeneng ubezethemba futhi enganamahloni ngokuzincoma ethi wenza umsebenzi omuhle e-SABC. Kodwa eqinisiweni, uyimoshile le nhlangano, wona zonke izinto ebezisebenza kahle futhi wamosha nemali yabakhokhi bentela njengoba kumanje ayinamali, idinga ukutakulwa wuhulumeni.
Kwelinye izwe lapho abakhokhi bentela behlonishwa khona futhi abaholi beqotho, wayengeke uMotsoeneng afinyelele kuleli zinga afinyelele kulo futhi enze umathanda ngale ndlela enze ngayo. Kodwa uMotsoeneng udelele izwe edeleliswa abaholi be-ANC abebemvikela ngoba ubazi ukuthi ngeke athintwe muntu. Ubefohla endleleni enza ngayo izinto njengendlela athatha ngayo isinqumo sokuthi wonke umculo ozodlalwa eziteshini zokusakaza zase-SABC sekuzoba ngu-90% womculo wakuleli, isinqumo asenza ngaphandle kokubonisana namuntu nanokubheka ukuthi yimuphi umthelela esizoba nawo.
Abebemvikela bebengenendaba nokuthi lokhu abekwenza bekuhlehlisela izwe emuva futhi kubeka imisebenzi yabasebenzi base-SABC engcupheni.
Kodwa-ke siyabonga ukuthi ekugcineni, bakhona asebebenesibindi sokuqeda lo mbhedo obuyisa i-SABC eweni.
Nokho, mkhulu umsebenzi okusamele wenziwe ukukhuculula insila eshiywe nguMotsoeneng futhi akuyena yedwa okumele aphelelwe ngumsebenzi.