Kuningi okuyimbangela yokubulawa kwabantu
MHLELI: Ngivumele ngibeke umbono wami mayelana nokubulawa kwabesifazane abanye baze bashiswe ngomlilo. Wonke umuntu, ngisho nezikhulu zikahulumeni, uyakhala ngokubulawa kwabantu kangaka ikakhulukazi abesifazane.
Ngiyafisa ukuthi uhulumeni wethu ake enze nje ucwaningo ngabantu abashona kusukela ngoMsombuluko kuze kube yiSonto, sithole ababulewe nje kuphela, bese nabo behlelwa ngokuthi laba badutshuliwe laba bagwazwa njalo njalo. Lokhu ngikushiso wukuthi ukufa komuntu kusho ukufa komndeni wakhe ube uphila.
Zolo lokhu kudutshulwe umsakazi elamulela abebebanjwa inkunzi. Wonke umuntu ukhalile namanje sisakhala. Kunabanye abathi makubuyiswe isigwebo sentambo kanti abanye basho okuhlukile. Ukubulawa kwabantu sikhale akubasizi abasazobulawa kusukela manje.
Ubugebengu lapha ezweni lethu busezingeni eliphezulu ngendlela yokuthi budida ngisho namaphoyisa. Kuyomele futhi sithole nokuthi kubona bonke abantu asebebulewe zingaki izigilamkhuba eseziboshiwe. Ake ngithi uma kubulawe 50 ngenyanga masikhonjiswe ukuthi zingaki izigilamkhuba eseziboshiwe ngalakho.
Lokhu kuzosiza uhulumeni nezakhamuzi ukubona ukuthi ngabe amaphoyisa esinawo asezingeni elifanele yini ekutheni asivikele kulolu laka. Uma kunamacala awu-500 lapho kubulawe khona abantu, kwase kuboshwa ngamacala awu 100 kusho ukuthi kasiphephile kule lizwe lethu.
Ngeshwa umbiko wamaphoyisa esiwutholayo kawubanzi ngokwanele. Ngelinye ilanga uye uzwe kuthiwa ubugebengu behlile kodwa uxakeke ukuthi behle kanjani njengoba abantu bebulawa mihla namalanga kuzo zonke izindawo.
Ngake ngabhala ngikhala ngezinkantolo ukuthi ngesinye isikhathi ziye zinikeze umuntu osolwa ngokubulala ibheyili ngoba zikholelwa wukuthi unelungelo lokuthola ibheyili, bese ebuya esabisa ofakazi, aphinde abulale. Ubuye futhi ubheke udaba oluthinta iziboshwa ezidedelwa ngoshwele. Kumele ngabe uhulumeni uselubhekile lolu hlelo ukuthi ngabe iziboshwa ezidedelwayo zisuke sezikulungele yini ukuhlala emphakathini. Lokhu ngikushiso wukuthi zolo lokhu isiboshwa ebesidedelwe sinqume ingane saphuza igazi layo. Siboshiwe kumanje siphephile sidla ukudla kwamahhala, sinodokotela wamahhala futhi sinamalungelo kodwa ingane ngeke iphinde ivuke. O’Brien “Scara “Gcabashe PHOLA-MLOSHI, INANDA