Usizi kogada umzukulu okhubazekile
UBHEKENE nosizi ugogo waseMlaza ongakwazi nokunyakaza njengoba egade umzukulu osephila ngokulala embhedeni ngenxa yokukhubazeka, ongakwazi nokuhlala.
UNkk Ntombini Shabane (76) ohlala endlini yomxhaso enekamelo elilodwa nomndeni wakhe, akasakwazi nokunaka eyakhe impilo ngenxa yesimo somzukulu uNksz Gugu Mdlalose (25).
Uthe nguye yedwa obheke ikhaya emuva kokushonelwa yizingane zakhe zonke zamshiya nabazukulu nabazukulwana abayisishiyagalolunye sebebonke. UNkk Shabane uthe umzukulu wakhe wayevele ekhubazekile emlenzeni wesokudla kodwa kwabheda kakhulu emuva kokuhlinzwa.
“Indodakazi yami yazala yena kuphela. Saqala ukunaka esecathula ukuthi umlenze uyacokama, odokotela bathi kumele ahlinzwe. Sesiyombona esibhedlela ngaqaphela ukuthi umlenze usubheke eceleni, okuthe uma ngibuza konesi bathi wodokotela abaziyo.”
Uthe waze waphuma esibhedlela umlenze ungasabuyeli esimeni, wagcina engasakwazi ukuhamba unomphelo.
Kuthiwa ziningi izinkinga zikaNksz Mdlalose ngoba unesifo sokuwa adla amaphilisi aso. Uke wahlinzwa nasesiswini okumanje siwumgodi emuva kokubhotshozwa imbobo ayedla ngayo ngamapayipi. “Angisazi nokuthi wayehlinzelwani esiswini ngoba sekukudala, nonina owazi kahle sewashona. Inkinga enkulu ukungakwazi ukuhamba ngoba akanaso nesihlalo esamasondo esimfanele. Kumanje usebenzisa iPrem nayo esincane kuyena. Uma eya emtholampilo kudingeka ngiqashe imoto ngicele abantu simqukule. Zonke izindleko zibheke mina ngoba kudingeka amanabukeni namaqakelo, konke ngikuthenga ngemali yempesheni.”
Utshele Isolezwe ukuthi akasazi kukangaki kufika abantu bezobabhalisa bathembise ukubuya nosizo kodwa akukaze kwenzeke. Uthe namanabukeni abexhaswa ngawo ngosonhlalakahle akasawatholi. Okwenza isimo sibe nzima kakhulu wukuthi bonke balala endlini eyodwa phezu kwesimo sikaNksz Mdlalose odinga ukunakekelwa ngokuyisipesheli.
UMnuz Thami Mkhize wenhlangano ezimele, Injobo Ithungelwa Ebandla, okunguye othinte iphephandaba, uthe bathinteka bebona usizi olubhekene nogogo. “Kwasiphatha kabi ukuthi lo mndeni onamalungu ayisishiyagalolunye ulala endlini eyodwa. Safike sabona nesimo sikaGugu, esingajabula uma ethola usizo lokunakekelwa okuyisipesheli ekhaya ngoba kudla ephakatheni ukuqasha izimoto. Sifisa nabazonikela ngamaqakelo nangamanabukeni ukwehlisa umthwalo kugogo.”
Le nhlangano isinikele ngosimende nesihlabathi kwakhiwa enye indlu osekusele ukuthi ifulelwe ifakelwe namafasitela.