Uyakhala uLorch osanda kuhlinzwa
UMDLALI we-Orlando Pirates, uThembinkosi Lorch, uyakhale njengoba ezophuthwa wumdlalo wamanqamu weNedbank Cup.
NgoJuni 24, iPirates izodudulana neSuperSport United eMoses Mabhida Stadium, eThekwini ngo-8.15 ebusuku. ULorch usanda kuhlinzwa ehlombe. Lokhu yikona okuzokwenza aphuthwe wumdlalo wamanqamu. Exoxa neSolezwe ukusho kwagcwala umlomo ukuthi udumele ngokuphuthwa yingqayizivele yokudlala kowamanqamu.
“Angikaze ngidlale emdlalweni wamanqamu selokhu ngiqale ukudlala ibhola esigabeni esikhokhelayo. KwiChippa United sifinyelele kowandulela owamanqamu weMTN 8 lapho sihlulwe khona yiSundowns. Yilona-ke ibanga elide engisalihambile emqhudelwaneni ebholeni elikhokhelayo. Bengizobe ngiqala ukudlala kowamanqamu. Ngakho ngidumele kakhulu ngokulimala ngesikhathi esibi. Ukulimala ke yinto ongeke uyivimbe uma ungumdlali webhola. Amajita ngiwafisela inhlanhla futhi angingabazi ukuthi uma ezimisele ngendlela abezimisele ngayo emidlalweni eyedlule nakanjani indebe kuzoba ngeyethu,” kusho uLorch.
Lo mdlali (23) ufike kwiPirates kwezwakala ngoJanuwari. Ekuqaleni kwesizini ubebolekiswe kwiChippa kodwa iBucs yambuyisa ngoJanuwari. “Sekuphele amasonto ayisithupha manje ngihlinzwe ehlombe. Bengithi ngizokwazi ukululama ngaphambi komdlalo wamanqamu kodwa lokho ngeke kwenzeke. Sengoze ngibuye ngeCarling Black Label Cup. Okumandi wukuthi ngiyabona ukuthi abalandeli bayangivotela. Ngicela baqhubeke nokungivotela nami ngeke ngibaphoxe.” KwiPirates ubanga ijezi nenqwaba yabadlali abaseqophelweni okubalwa kubona uThabo Rakhale, Thabo Qalinge, Mahlatse Makudubela, Luvuyo Memela noRiyaad Norodien. “Umbango wejezi yinto ongeke uyibalekele ebholeni. Uma ufuna ukuba ngcono njengomdlali kumele ubhekane nawo. KwiPirates yinto okumele uyilungele ngoba iyiqembu elikhulu okusho ukuthi nabadlali abadlala khona abaseqophelweni eliphezulu. Okumqoka wukusebenzisa ithuba nethuba olunikwa ngumqeqeshi,” kusho uLorch.
IPirates sekuphele iminyaka emithathu ingawini lutho. Igcine ukuphakamisa indebe ngo-2014 ngesikhathi inqoba iNedbank Cup eThekwini. “Ngesizini ezayo ngizimisele ngokuwina izicoco nePirates. Ngesikhathi ngisayina kuyona ngisuka kwiMaluti (FET College) ngangizele ukuzonqoba izicoco. Njengamanje sengidlale izinyanga eziyisithupha. Kulezi zinyanga sikwazile ukufinyelela kowamanqamu weNedbank. Ngakho ngesizini ezayo kumele silwele ukufinyelela emidlalweni yamanqamu nakweminye imiqhudelwano bese siyayiwina.”