Ujabule usihlalo weCity ngokuqoka uMcCarthy
AKAZISOLI nakancane usihlalo weCape Town City, uJohn Comitis, ngokugixabeza uBenni McCarthy ngesikhundla sokupheka iqembu njengoba egcine emenyezelwe ngokusemthethweni izolo ekuseni.
UMcCarthy unikezwe inkontileka yeminyaka emithathu epheka iCity. Uthathe izintambo ngemuva kokushiya kuka-Eric Tinkler osekwiSuperSport United.
“Akukho nokuncane ukungabaza ngesinqumo engisithathile. Ngiqale ukuxoxisana naye uBenni ngoLwesihlanu. Ngithe uma ngimfaka imibuzo, izimpendulo abenginikeza zona zingihlabe umxhwele ngabona ukuthi nguyena ofanelwe yilo msebenzi kwazise ubeqhamuka namasu amasha okuyisa iqembu phambili,” kusho uComitis.
“Ngaphandle kokuqhubeka nokuthi iqembu lenze kahle enkundleni, sobabili sinephupho elifanayo lokwakha inqanawe yeqembu lapha eKapa, siphinde sibuyisele emphakathini.”
UMcCarthy, odabuka eHanover Park, eKapa, akaqali ukusebenza noComitis, phela yingaphansi kwakhe lapho athola khona ukudlala ibhola esigabeni esiphezulu.
Le ngwazi, ebinethalente eliyisimanga lokuqhulula amagoli, ihambe yaze yafika phesheya kwezilwandle lapho ithole indondo ye-Uefa Champions League ne-FC Porto, ePortugal. Ibuyele ekhaya yafika yawola izicoco ne-Orlando Pirates ngaphambi kokuwagaxa emgibeni amakhokho ng-2013.
Kusukela lapho uMcCarthy uphumele obala ngokuthi uzoya kofundela ukuqeqesha njengoba ngoJanuwari ezitholile izicucu ze-Uefa A Licence. Ufike kuleli qembu laseKapa livele seliqalile ukusayinisa abadlali.
ICity imemezele u-Ayanda Patosi noJeitoso waseMozambique njengabadlali abasha.
“Sikhulumile naye (uBenni) ngabadlali esesibasayinisile, uchazeke kakhulu ngoba ukholwa wukuthi bazoza nesipiliyoni esidingwa yiqembu. Kumanje sesibheka abanye ababili esizobamemezela maduze,” kusho uComitis. UMcCarthy uhambile izolo ebusuku, wabuyela eScotland lapho enomuzi khona kwazise ushade nentokazi yakhona. Kuthiwe uzobuyela kuleli esezoqala umsebenzi ngoJuni 26.