Kukhale izembe kubadlali beChiefs
IDEDELE izembe iKaizer Chiefs ixosha abadlali abayisikhombisa abangekho ezinhlelweni zomqeqeshi uSteve “Mphathi” Komphela.
Izolo Amakhosi akhiphe isitatimende ememezela ukuthi asehlukene noSiyanda “Magazi” Xulu, Camaldine Abraw, Lucky Baloyi, Lewis Macha, Siphelele Mthembu, inkontileka yakhe engazange ivuselelwe, u-Enocent Mkhabela, osezoba ngowePlatinum Stars abebolekiswe kuyona, noMitchell Katsvairo, ozobolekiswa isizini yonke.
UBobby Motaung oyimenenja yaMakhosi udalule ukuthi badedele laba badlali ngoba bebewukudla kwebhentshi.
“Bebenezinkontileka neqembu kodwa ngenxa yokuthi abazange balithole ithuba elanele lokudlala sibone ukuthi kungakuhle bathole amakhaya amasha kwezinye izindawo. Sikhethe ukwenza izinguquko esikwatini sethu kusenesikhathi ukuze sikwazi ukuzilungiselela kahle uma sekuqala isizini entsha. Abalandeli bethu siyabakweleta ngemuva kokungenzi kahle kumasizini amabili adlule,” kusho uMotaung.
IChiefs iphinde yaveza ukuthi isiqashe uPatrick Mabedi ozovala isikhala esishiywe uJohn Paintsil.
UPaintsil, odabuka eGhana, nguyena obelekelela uSteve “Mphathi” Komphela opheka Amakhosi. Inkontileka yakhe inqanyuliwe kwazise bekumele iphele ngo-2018.
UMabedi ugixabezwe ngenkontileka yeminyaka emibili eNaturena. Le ngwazi yazakhela igama ePhefeni ngesikhathi Amakhosi edla izicoco ezimbili zePremiership ngo-2003/2004 nango-2004/2005.
Ngesizini edlule ubeqeqesha iCape Town All Stars egijima kwiNational First Division (NFD). Phambilini uke waba yibamba labaqeqeshi kwiMoroka Swallows isagijima kwi-Absa Premiership. UMabedi, owayengukaputeni weChiefs, uke wasebenza naseqenjini lesizwe laseMalawi njengephini lomqeqeshi.
Izindaba zokuqashwa kukaMabedi ziqinisekiswe nguVina Maphosa wezokuxhumana kwiChiefs esitatimendeni asithumele kwabezindaba izolo ntambama.
UMabedi ucashunwe kulesi sitatimende ejabule ngokubuyela kwiChiefs okuyiqembu agqama kakhulu kulona ngesikhathi esadlala ibhola.
“Ngiyajabula ngokubuyela ekhaya. Sengibheke ukufaka isandla empumelelweni yesikhungo esikhulu. Kuyinto enkulu. Ngifisa ukubonga izikhulu zeqembu ngaleli thuba,” kusho uMabedi kulesi sitatimende.
UKomphela usesebenze namaphini amabili selokhu efike kwiChiefs kodwa kubukeka sengathi konke lokho akuthelanga izithelo ezinhle. Ngesizini yakhe yokuqala kwiChiefs ubesebenza noDoctor Khumalo. Ekupheleni kwesizini uKhumalo ugudluziwe kulesi sikhundla ngemuva kokuvela kwezindaba zokuthi ababoni ngaso linye.
Ekuqaleni kwesizini uKomphela ulande uPaintsil asebenze nayo njengomdlali kwiMaritzburg United. UPaintsil ubeqala ukusebenza njengomqeqeshi kwiChiefs okuyinto ebeyenza bashaye amakhala abanye ngamagalelo akhe.
Ngaphambi kokuthi alande uPaintsil uke wazama uMandla Ncikazi kwiLamontville Golden Arrows kodwa lo mqeqeshi wagcina ekhethe ukuhlala kuBafana Bes’thende.