Akabasoli abadayisa amalungelo kwiPSL
UMPHATHI weJomo Cosmos, uJomo Sono, akayiboni inkinga ngosomabhizinisi abathenga amalungelo okudlala kwi-Absa Premiership.
Umkhuma wokuthengwa nokudayiswa kwamaqembu adlala esigabeni esikhulu usuphenduke insakavukela kwiPremiership. Ngesizini edlule uJohn Comitis uthenge iMpumalanga Black Aces wayiqala kabusha. Njengamanje isiyaziwa ngeCape Town City.
Ngayo isizini edlule uPanyaza Lesufi, ongungqongqoshe wezeMfundo eGauteng, ubehlanganisa ithimba ebelifuna ukuthenga iFree State Stars. Bebehlela ukuvusa iMoroka Swallows esidlala kwi-ABC Motsepe League.
Kumasizini amabili amabili edlule, Usuthu belufuna ukuthenga i-Aces kodwa lwachithwa yimithetho yePremier Soccer League (PSL) engavumi ukuthi uthenge uma kade ugawulwe yizembe.
Eminyakeni eyedlule Usuthu lwathenga iDynamos ukuze lubuyele esigabeni esikhulu. Isiqumama uSibusiso Mpisane nowakwakhe uShawn kunemibiko yokuthi bafuna ukuthenga iFree State.
USono uthe akayiboni inkinga ngendaba yokuthengwa nokudayiswa kwamaqembu kulabo abakuthandayo.
“Asikhulumeni iqiniso bakwethu, e-England amaqembu athengwa ngapha nangapha. AmaChina yiwona aphethe amaqembu ase-England. Osomabhizinisi baseRussia bayawathenga amaqembu futhi ayikho inkinga. Indaba yokudayiswa kwamaqembu yinto eyenzeka umhlaba wonke. Ibhola alisafani nesitokofela, seliyibhizinisi manje. Kusetshenzwa indaba yemali,” kusho uSono.
Njengamanje AmaZulu neSwallows basezinhlelweni zokuthenga iThanda Royal Zulu engompetha beNational First Division (NFD).
“Uma umuntu efika kuwena no-R80 million ethi ufuna ukuthenga iqembu lakho into yokuqala oyenzayo wukubheka iphakethe lakho njengosomabhizinisi. Uma ubona ukuthi awunayo imali, uyayithatha le mali bese uthatha u-R10 million, uyothenga iqembu kwiNFD ngemuva kwalokho wenze inzuzo ka-R70 million. Ngisho eStock Exchange awuyenzi imali efana nale,” kusho uSono.
Usuthu olufuna ukuthenga iThanda ludlala kwiNFD. ISwallows isiyibamba kuSAB League, eGoli.
“Ebhizinisini indaba yokucabangelana yinto engasebenzi, kwenziwa inzuzo. Uma ubheka amabhange, abulalana wodwa ngoba afuna ukwenza inzuzo.
“Abanandaba ukuthi kwenzekani kwelinye ibhange. Nebhola-ke kumele silithathe njengebhizinisi. Uma abantu befuna ukudayisa nokuthenga abenze njalo, uma bevunywa noma bephikwa yimali.
“Ngeke ulindele iqembu elifana neQwa Qwa Stars elingenabo abaxhasi nemali yokukhokhela abadlali, liqhubeke lihlale esigabeni esikhulu. Ulindelene ukuthi benzenjani? Bahlale ngoba becabangela abantu? Kumele badayise,” kusho uSono.
“Angisoze ngalidayisa iqembu lami, angiyiswele imali. Angiyidingi imali, into engiyifunayo yinjabulo,” kuphetha uSono.