Uphelezelwe yingoma ethulwa kwiCT City
UNGENE ephelezelwa yingoma eyashisa izikhotha ayenza neqembu le-kwaito, iTKZee ngo-1998, uBenni McCarthy, ngesikhathi ethulwa phambi kwabezindaba njengomqeqeshi weCape Town City izolo ekuseni eKapa.
Izintatheli bezicuthe ngamakhamera, kuwubuxhafaxhafa uMcCarthy ephelezelwa yingoma, Ishibobo, ebisho phezulu, ezinye izinhlavu zayo ezithi, “Benni is in the 18 Area”.
UMcCarthy (39) uthe yize efundile kubona bonke abaqeqeshi adlale ngaphansi kwabo kodwa ufuna ukuzicabela eyakhe indlela. Ubalule uJose Mourinho anqoba naye isicoco se-Uefa Champions League njengemfivilithi yakhe.
Le ngwazi ifuna ukubukela kuMourinho ngokuba umqeqeshi onqoba izicoco.
“UJose Mourinho kwiFC Porto nguyena ohamba phambili engisebenze naye. Ubecophelela kukhona konke akwenzayo, ungumnqobi wokuzalwa, indoda yezicoco. Wayengumqeqeshi othandwa ngabadlali ofuna ukuzwana esikwatini.
“Nami kukhona engikuntshontshile kubaqeqeshi engisebenze nabo. Kodwa ngifuna ukuba yimina. Ngizosebenzisa engikufundile ngenze eyami indlela yokuqeqesha,” kusho uMcCarthy.
Uthembisile ukuthi ngeke enze izinguquko ezitheni eqenjini.
ICity ezoqeda unyaka yasungulwa ngemuva kokuthengwa kweMpumalanga Black Aces nyakenye, inqobe isicoco seTelkom Knockout ngesizini edlule yaqeda endaweni yesithathu ku-log.
Uthe okubalukile wukuthi abadlali baziphathe kahle futhi kube nobumbano eqenjini.
UMcCarthy uqale ibhola eneminya engu-17 kwiSeven Stars ngaphambi kokudlulela kwi-Ajax Cape Town. Usuke lapho waya phesheya okumhlomulise ngesicoco seChampions League. Ubuyele ekhaya wafika waqhulula amagoli kwi-Orlando Pirates iwina izicoco, uthatha umhlalaphansi ngo-2013.
Umdlalo kaBenni wokuqala lapho kuzocaca khona ukuthi yini eza nayo kwiCity, uzobhekana nePolokwane City kwiMTN 8 ekuqaleni kwesizini. Imidlalo yeMTN 8 ivamise ukudlalwa ngaphambi kokuqala kwesizini ye-Absa Premiership.