Ubhuntshile umcimbi kaKhuzani
KUBHUNTSHE umcimbi wokubungaza uKhuzani “Indlamlenze” Mpungose ngempumelelo yakhe ngakubo kwembangi yakhe, uMthandeni “Igcokama Elisha” Manqele, ngoba inkosi yendawo, uBonga Mdletshe, ingahambisani nokufika kwakhe endaweni bengakathelelani amanzi noMthandeni.
Umcimbi ubuhlelwe ngabalandeli bakaKhuzani eMganini, eHluhluwe, uzoba ngeSonto. Ngokusho komthombo obukhona emhlanganweni obuphakathi kwabalandeli baKhuzani nomkhandlu wenkosi enkantolo yesizwe, abalandeli baKhuzani bagcine bedubile ngenxa yokuthi bebengahambisani nokunqatshelwa kukaKhuzani.
NoMthandeni wake wavinjwa yinkosi yangakubo kaKhuzani, uZakhe Mpungose, ukuyonandisa kwiNkandla May ngoba isabela ukuphepha kwakhe.
Umholi wabalandeli baKhuzani obekhona emhlanganweni, uMnuz Mduduzi “Zinyokanyoka” Mkhize, usole inkosi ngokuthi icheme neGcokama njengoba lizalwa yisihlobo sayo. “Kaseneme neze ngoba besifuna ukubungaza iqhawe lethu futhi siqwashise ngokubulawa kwabantu besifazane nezingane njengentsha yaseMdletsheni.”
UMkhize uthe sebewuhlehlisile umcimbi ngemuva kokubonisana noKhuzani. “Sehlele ngezansi ngemuva kokubonisana neqhawe lethu, sathatha isinyathelo sokuwuhlehlisa umcimbi. Sizolinda umhlangano obizwe yinkosi ngoJuni 22 ozobe uphakathi kukaMthandeni noKhuzani.”
Ichaza inkosi ithe okwenze bavimba uKhuzani wukuthi babone ukuthi uqonde ukuzoqhoshela uMthandeni hhayi ukuzogubha nabalandeli bakhe.
“Mina ngithi kufanele kuqale kuhlanganwe nabo ukuze bakhumelane umlotha ngaphambi kokuba uKhuzani azogubha nabalandeli bakhe endaweni yami. Ngifuna ngalo mcimbi kube khona noMthandeni ukuze kube mnandi.”
Ithe ayinankinga nokuqhubeka komcimbi kodwa engahambisani nakho ukufika kukaKhuzani futhi ivumile ukuthi ihlobene noMthandeni kodwa lokho auahlangene nesinqumo sayo.
UKhuzani uthe usishayele ihlombe isinyathelo esithathwe ngabalandeli bakhe baseMdletsheni ngokuhlehlisa umcimbi kuze kube kuyaxoxwa ngoJuni 22.
“Lokho nje kukhombisa ukuthi balandela umuntu ohloniphayo. Ngingakujabulela futhi ukufika kukaMthandeni kulowo mcimbi naye afake isikibha esi-blue ukuze abantu bezobona ukuthi ayisekho impi njengoba inkosi ifuna naye abekhona emcimbini.”
Uthe usuku olusha luzomenyezelwa ngokusemthethweni maduze ngemuva komhlangano.
Sekuzanywe kabili ukuhlanganisa uKhuzani noMthandeni kodwa wangalubhada uMthandeni emihlanganweni ebisuke ibiziwe.
Ukuvinjwa kukaKhuzani akuphathanga kabi abalandeli bakhe kuphela kodwa kucike nabanye abaculi bendawo abanjengoMandla Mkhize waMagusheshe nomholi wenhlangano yomphakathi uMnuz Nhlanhla Ntuli, we-Ezibayeni Flagship, okhale kakhulu ngepolitiki yakule ndawo.