Linikwe ibheyili ka-R1000 iphoyisa
LITHOLE ibheyili ka-R1000 iphoyisa loPhiko lwezobuNhloli eliboshwe nomfowabo omncane nosibali wabo ngecala lokwakha itulo lokusoconga umfowabo wenkosi yesizwe saKwaMpukunyoni, eMtubatuba.
Izolo umshushisi uMnuz Linda Duma utshele inkantolo yeMantshi yaKwaMsane ukuthi maningi amahlebezi ngaleli cala kodwa inhloso yenkantolo wukuveza ubufakazi obuqanda ikhanda ngezinsolo ezisuke zishiwo, hhayi ukunqumela abantu ogodweni.
Uthe ngoLwesithathu olwedlule icala lalihlehliselwe ukuthi abasolwa abathathu okunguMnuz Mfanafuthi Madondo, Sihle Nkanyiso Mlambo noMuziwenkosi Madondo bafake isicelo sebheyili. Ummeli womsolwa wokuqala nowesibili okungoMfanafuthi noMlambo, uMnuz Thulani Vusi Madela wenkampani iScheepers Spies Mdaka Inc, uthe abamele ngeke basifake isicelo sebheyili futhi bachazeliwe ngomthelela wokwenza lokhu.
Ummeli womsolwa wesithathu okunguMuziwenkosi, uMnuz Mbongeleni Mchunu wenkampani yabameli iMchunu Bulose & Partners, uthe ikhasimende lakhe limsulwa futhi liyilungu lomphakathi elihloniphekile, lineminyaka engu-36 lazalelwa eNkundwini, eMtubatuba kanti lisebenzela eGoli. UMchunu uthe linezingane eziyisithupha elizinakelelayo nengoduso yalo, ugogo nomfowabo omncane. IMantshi uMnuz T Boloka ibuze ukuthi ngabe zonke izingane eziyisithupha zomsolwa wesithathu zizalwa ngowesifazane oyedwa, kwaba nokunsinsitheka enkantolo. UMchunu ube esesondela kumsolwa wesithathu ebuza ukuthi yizingane zomuntu oyedwa yini, wabuya esethi cha, ngezomama abahlukene bese ezimbili kube ngezengoduso yakhe.
“Ikhasimende lami lihola R15 000 ngenyanga kodwa ligoduka no-R11 000 namanikiniki emuva kokuthathwa kwentela. Lizokwazi ukukhokha ibheyili ka-R1000 uma inkantolo yemukela isicelo sebheyili,” kusho uMchunu.
IMantshi ikhiphe isinqumo sokuthi umsolwa wesithathu kulungile adedelwe ngebheyili ka-R1000. Icala lihlehlele uJulayi 21. Inkantolo ibigcwele ivalwe ngomuntu kanti ezokuphepha beziqinile kangangokuthi amaphoyisa ahlele abantu bezinhlangothi zabasolwa nabantwana besizwe sabaKhwanazi ukuthi bangene ngamaqoqo angu-10 ukuze kuhlale isibalo esilinganayo ngaphakathi.
Ngaphandle kwenkantolo abantwana baKwaMkhwanazi bebehlangene bodwa kanti nabaseka abakwaMadondo bebebodwa.
UMntwana uSboniso Mkhwanazi okusolakala ukuthi nguye owayelalelwe unyendle ngabasolwa uthe uyabaxolela kodwa ufuna ukwazi ukuthi ngubani owayebathumile ukuze azi ukuthi kungani emhlelela into embi kanjena.
Uthe akakaze avule icala lokusocongwa kodwa ngamaphoyisa ambize ukuthi akazokwenza isitatimende emuva kokuboshwa kwabasolwa kwazise naye wasongelwa ngabasendlunkulu.