ICosatu ikhala ngezinkampani zamakhambi
UKUSUNGULWA kwenkampani kahulumeni ezokhiqiza amakhambi okwelapha kungaba yisisombululo ekuvimbeni izinkampani ezinomhobholo ezikhona manje ukuthi zixhaphaze iziguli ngokubizisa imikhiqizo yazo singekho isidingo.
Lokhu kushiwo yiCosatu ngemuva kokuthi iPhini likaKhomishana yokuncintisana, iCompetition Commission, limemezele ukuthi liphenya izinkampani ezikhiqiza imithi yokwelapha umdlavuza ukuthi awukho yini umkhonyovu ngokwenyusa kwazo imali yokudayisa le mithi.
Iphini likaKhomishana yokuncintisana uMnuz Hardin Ratshisusu limemezele ngoLwesibili ukuthi ikhomishini iphenya izinkampani ezintathu okuyi-Aspen, Roche nePfizer ngokubiza ngokwedlulele kwemithi eziyikhiqizayo yokwelapha umdlavuza.
Uthe kunemishanguzo esetshenziswa kuleli yokwelapha umdlavuza efana ne-GSK ekhiqizwa abakwa-Aspen okuqaphelekayo ukuthi yenyuke kakhulu selokhu yaqala ukusetshenziswa kuleli.
Uqhube wathi le mithi yelapha izinhlobo ezehlukene zomdlavuza. Uthe iRoche ikhiqiza imishanguzo yokwelapha umdlavuza webele, iPfzer ikhiqiza imithi yokwelapha umdlavuza wephaphu, i-Aspen ikhiqiza imithi eyehlukene kuyona okubalwa imithi yokwelapha umdlavuza wegazi iLeukaemia, owomnkantsha neminye.
URatshisusu uthe kusolwa ukuthi lezi zinkampani zenyuse imali yokuthengwa kwemikhiqizo yazo kwaze kwafinyelele ku-100%.
“Okuqaphelekayo Wukuthi lezi zinkampani eziyizikhondlakhondla zenza umkhuba ofanayo nakwamanye amazwe eziwadayisela imithi yokwelapha umdlavuza njengase-UK, Spain nase-EU. Wonke la mazwe akhathazekile ngokubiza kwale mithi. Kumele zisichazele ukuthi akukho yini ukuhlangana ezikwenzayo ngemali eziyibizayo ngamakhambi eziwadayisayo,” kusho uRatshisusu.
UMnuz Sizwe Pamla okhulumela iCosatu, uthe lezi zinkampani zinegama elibi. Uthe ngo-2001 zazama ukufaka ingcindezi ekutheni kuchitshiyelwe umthetho, iMedicines and Related Control. Lo mthetho yiwo owagunyaza elakuleli ukuthi linikeze iziguli ezinegciwane lengculazi imishanguzo. Uthe lezi zinkampani eziyingxenye yePharmaceutical Manufactures Association (PMA), zahlangana zanxusa izinkampani ezazinelungelo lokudayisela iNingizimu Afrika imithi yokwelapha izifo ezingosomathuba ukuthi zihlawulise iNingizimu Afrika uma iqhubeka nalo mthetho. “Sekunesikhathi sikhuluma ne-ANC ukuthi iqale uhlelo lokukhiqiza THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. imithi okwavunyelwana ngalo ngo-2007 engqungqutheleni eyayisePolokwane. Asazi ukuthi yini ebambile ukuthi iKetlaphela iqale ukusebenza, le nkampani bekumele iqale ukukhiqiza imithi nyakenye,” kusho uPamla.
Inhlangano egqugquzela ukuthi kulungiswe imithetho elawula amalungelo okukhiqiza imithi, iFix the Patent Laws Coalition isishayela ihlombe isinyathelo sekhomishini sokuzama ukunqanda izinkampani ezingogombela kwezazo.
UNksz Luvo Nelani okhulumela le nhlangano, uthe baqale umkhankaso oqanjwe ngegama lowesifazane owashona engakalitholi ikhambi lokwelapha umdlavuza webele, uNksz Tobeka Daki.
Uthe uNksz Daki washona ngenxa yokuthi wehluleka ukuthenga imithi eyayibiza u-R500 000 kudokotela ozimele.
Uthe isiguli esizokwelashwa ngeTrastuzumab ezikhungweni zezempilo ezizimele sikhokha u-R511 000 ezikhungweni, ezimbalwa zikahulumeni isiguli kuba wu-R211 000.
Uthe lo mshanguzo ukhiqizwa iRoche okuyiyona enelungelo lokuwukhiqiza emazweni amaningi kuze kube u-2033. ENingizimu Afrika ilungelo layo liphela ngo-2020.
Umkhankaso wabo uthe ubuhlanganisa ukubhikisha emahhovisi eRoche, beyiphoqa ukuthi yehlise imali edayisa ngayo imishanguzo.
Uqhube wathi le nkampani yenza ngawo wonke amandla ukuthi nalapho ilungelo layo seliphelelwe yisikhathi ivimbele ezinye izinkampani ukuthi zikhiqize amakhambi abiza kahle.
I-Aspen kwi-website yayo, ithe awukho umkhonyovu ewenzayo. Ithe imali edayisa ngayo imithi ilawulwa wumthetho i-regulatory framework. Ithe imithi eyidayisayo isezingeni eliphezulu elihambisana nentengo abayibizayo.
UNkk Aadila Fakie weRoche, uthe ikhomishini yokuncintisana yakuleli beyingakaxhumani nabo.
UMnuz Johnny Moloto wePfizer, uthe usibonile isitatimende sabezindaba esithunyelwe ikhomishini yokuncintisana, uphikile ukuthi le nkampani idayisa imishanguzo yokwelapha umdlavuza wamaphaphu ngo-R152 000.
“Sisalinde ukuthi ikhomishini isithinte ukuze sichaze ukuthi imithi esiyidayisayo ibiza malini. Siyakuhlonipha okwenziwa ikhomishini futhi sizobambisana nayo,” kusho uMoloto.