INumsa ifuna kuphenywe uNgubane
uNgubane usulile.
Ungqongqoshe ube esememezela ukungena kukaMnuz Zethembe Khoza, kulesi sikhundla njengozobamba okwesikhashana.
IPhini likaMengameli weNumsa uNksz Ruth Ntlokotse, esitatimendeni abasikhiphile, lithe bese kuyisikhathi sokuthi kwenzeke lokhu kwa-Eskom.
“Siyakwemukela ukusula kukaDkt Ben Ngubane ebhodini yakwa-Eskom, kumele abhekane nawo wonke amacala enzekile ngesikhathi esenguSihlalo kule nkampani. Ukwesula kwakhe akusho ukuthi adedelwe ngezinto ebeziqhubeka kwa-Eskom. Sicela kuqale uphenyo mayelana nabantu abebenikezwa amathenda ngesikhathi esaphethe nokuthi bekumele yini abe khona,” kusho uNksz Ntlokotse.
Uthe uNgubane kuyacaca ukuthi njengoba eshiya lesi sikhundla kukhona amabhizinisi afuna ukuwaqala.
Ukushiya isikhundla kukaNgubane kulandela ukuthi iPhalamende lithathe isinqumo sokuthi kuphenywe kwa-Eskom ngemuva kwezinsolo zokuthi kube nokungaphathwa kahle ekukhipheni amathenda ezintweni ezithinta uhulumeni.
“Sisakhathazekile ngesinqumo esathathwa yibhodi sokubuyisela uDkt Brian Molefe esikhundleni sakhe,” kusho uNtlokotse.
Baqhube bathi lokhu okwenzakayo okuthinta uMolefe kubeka ngokusobala ukuthi ebhodini yakwa-Eskom naseminyangweni kahulumeni kukhona okungahambi kahle.