Anikezwe izimoto amaphoyisa iTrio Task Team
ABAPHANGI abasawasabi amaphoyisa, uma sebehlelile ukuthi bazobamba inkunzi, bayaqhubeka noma bebona ukuthi amaphoyisa asezithendeni zabo.
Lokhu kushiwo uBrigadier Jay Naicker wamaphoyisa KwaZulu-Natal muva nje, ngesikhathi kunikezwa izimoto ithimba lamaphoyisa aqaphe izigameko zokuphanga emakhaya, emabhizinisini nokugqekeza KwaZulu-Natal, i-Trio Task Team.
UNaicker uthe isigameko sangeledlule lapho abaphangi bevulele khona ngenhlamvu emaphoyiseni kwaphazamiseka isu labo lokuqhumisa ama-ATM enxanxatheleni yezitolo kwaWebber, eHammarsdale, sikhombise ngokusobala ukuthi izigebengu ziphume umkhankaso wokubhekana ngqo namaphoyisa.
“Abaphangi babenethuba lonke lokuthi bangaqhubeki nokuzama ukuqhumisa ama-ATM ngoba bawabona amaphoyisa ngesikhathi befika kodwa abekwenzanga lokho bavele bavulela ngenhlamvu. Abagcinanga lapho noma sebejahwa ngamaphoyisa bebaleka ngezinyawo abazange bathi maluju bebelokhu beqhubeka bedubula. Ababalekela eMophela nabo abazange bathi maluju uma bebona ukuthi amaphoyisa asebabambile baqhubeka badubula,” kusho uNaicker.
Kulesi sigameko kwashona iphoyisa namadoda ayisishiyagalombili okusolwa ukuthi ayeyophanga.
UNaicker uthe bakhulumile nabanikazi bezitolo ezinxanxatheleni zezizitolo kulesi sifundazwe ukuthi baqinise ezokuphepha ngoba izigameko zokuphangwa kulezi zindawo zidlangile.
Umphathi wethimba elinikwe izimoto, uBrigadier Tefo Mpete uthe lezi zimoto zizobasiza kakhulu ngoba bekuba nezikhathi lapho ithimba labo belingakwazi ukufinyelela ngesikhathi lapho kubikwa khona ubugebengu.
“Kwesinye isikhathi izimoto ebesisuke sizibolekile bezingakwazi ukusifinyelelisa ngokushesha lapho sidingeka khona. Ngiyethemba ukuthi sesizokwenza kangcono kakhulu,” kusho uNaicker.
Leli thimba libunjwe ngoJanuwari nonyaka kanti linikwe izimoto ezingu-12.
UKhomishana osabambile KwaZulu-Natal uMajor General Bheki Langa, uthe imali yokuthengela leli thimba ezinye izimoto ezingu-17 isikhona kanjalo neyokulikhokhela uma lisebenze isikhathi esengeziwe.