Baphakamisa abasengozini yengculazi ngeTruvada
ININGIZIMU Afrika kufanele ilinike abasengozini enkulu yokungenwa yigciwane lengculazi iphilisi lokuligwema iTruvada.
Lokhu kuvezwe ngungoti wezocwaningo, uSolwazi LindaGail Bekker weDesmond Tutu HIV Foundation ekhuluma engqungqutheleni yegciwane lengculazi, iSA AIDS Conference e-ICC, eThekwini.
Imiphumela yocwaningo lwaphambilini iveze ukuthi iTruvada ingasetshenziswa ohlelweni lokugwema igciwane lengculazi, iPre-exposure prophylaxis (PrEP). Kuvele ukuthi leli philisi lingagwema ukuthi ongenalo igciwane atheleleke uma ezolisebenzisa nsuku zonke.
USolwazi Bekker uthe ukholwa wukuthi uhulumeni angayonga imali uma engaqinisa ekutheni avikele intsha nabasengcupheni yokuthola igciwane lengculazi.
Izibalo zakuleli zikhombisa ukuthi yintsha enezibalo eziphezulu zabantu abangenwa yigciwane lengculazi, ikakhulu abantu besifazane abaneminyaka ephakathi kuka-15 no-24.
Leli gciwane liphinde lidlange kakhulu kubantu abadayisa ngomzimba nabesilisa abathandana nabobulili obubodwa.
USolwazi Bekker uthe ukunika abantu imishanguzo yokuvika igciwane lengculazi kungcono kakhulu kunokubanika imishanguzo yokulithithibalisa ngoba sebethelelekile.
“Uma umuntu esenegciwane lengculazi kuzofanele uhulumeni amhlinzeke ngama-ARVs impilo yakhe yonke. Lapho uyobe esekhokhela amaphilisi amabili, aphinde akhokhele nezinhlelo zezempilo azobe esezidinga. Okufanele kubhekwe uhulumeni manje ukuqinisekisa ukuthi leli philisi lifinyelela kubantu abasengcupheni enkulu yokuthola igciwane lengculazi,” kusho uSolwazi Bekker.
Okwamanje leli philisi lingatholakala emakhemisi ngencwadi kadokotela kulabo abakwazi ukulithenga ngemali elinganiselwa ku-R270, amaphilisi angu-28 angathathwa inyanga yonke.
Uhulumeni wakuleli usabheka ukuthi angalihlinzeka kanjani kubantu nokuthi ubani okufanele abekwe phambili uma selihlinzekwa.
Iphini lomqondisi jikelele eMnyangweni wezeMpilo kuzwelonke, uDkt Yogan Pillay usanda kuveza ukuthi okwamanje iTruvada isanikwe abantu abadayisa ngomzimba. Kunophenyo olwenziwa ezindaweni ezahlukene kuleli lapho linikwa khona intsha nabesilisa abalala nabanye besilisa. Lokhu kuyingxenye yophenyo ngokuthi lingayiswa kanjani emphakathini.
Kuzothi uma sekuphume imiphumela yalolo phenyo babesebazi ukuthi bazolihlinzeka kanjani ezikhungweni zikahulumeni.
USolwazi Bekker uthe kuzofanele kubhekwe nokuthi yiziphi izindlela ezingcono zokulikhangisa ukuze lamukeleke kubantu nokuthi iyiphi indlela yokuliyisa kubona.
Enye yezinto abaziphenyayo wukuthi yikuphi okuzokwamukeleka kubantu abasha phakathi kokuthi balithole emitholampilo noma liyiswe kubona lapho behlala khona.