Uphika eyokuxoshwa kwabokufika ezibhedlela
UNGQONGQOSHE wezeMpilo kuzwelonke, uDkt Aaron Motsoaledi, uthe abukho ubufakazi bokuthi abantu bangaphandle bayaxoshwa ezibhedlela zaseNingizimu Afrika.
UMotsoaledi uthe empeleni iningi lezibhedlela libike ukuthi ezinganeni ezizalwe kuzo zingaphezulu kuka-50% ezabokufika. Ekhuluma ekomidini lezempilo ePhalamende izolo, uMotsoaledi uthe uphathwa kabi yimibiko engasilo iqiniso yokuthi owesifazane waseDemocratic Republic of Congo ubelethe ingane ePark Town Station eGoli ngenxa yokuxoshwa ezibhedlela eziningi eGauteng.
UMotsoaledi uthe uphenyo lukhomba ukuthi uNkk Francine Kalala akafikanga esibhedlela eTshwane ngo-2 entathakusa wase elinda amahora efuna usizo. I-video yeCCTV yakhombisa ukuthi wafika ngo05h13 ekuseni wahamba ngo-05h55. Imibiko yokuthi lona wesifazane waya eSteve Biko Hospital kwatholakala ukuthi ingamampunge njengoba i-video ikhombisa ukuthi akaze angene esangweni lesibhedlela. Uthe uhanjiswe esibhedlela iCharlotte Maxeke ngemuva kokubeletha. UMotsoaledi uthe ukuthi wanqatshelwa usizo ngamanga.
Lona wesifazane wahlolwa amahora ayisithupha njengenjwayelo kwase kuthiwa akaye esibhedlela saseHilbrow kuyoqhutshekwa nokumnakekela.
UMotsoaledi, obebonakala ukuthi akeneme, utshele amalungu ePhalamende ukuthi okushiwo ngowesifazane nodaba olwabhalwa yintatheli esayithwasa yaseUnited States yayiqonde ukuthunaza ezempilo zaseNingizimu Afrika. “Abaningi bathatha ngokuthi ezempilo zakuleli zinonya, zicwasa ngokobuzwe kangokuba owesifazane nengane esanda kuzalwa bahlukumezeka ngendlela eyisimanga.”
UMotsoaledi uthe uMthethosisekelo wakuleli uqinisekisa ukuthi akekho oxoshwayo uma edinga usizo oluphuthumayo lwezempilo ngisho ekuleli ngokungemthetho. Uthe ubufakazi ababutholile wukuthi uNkk Kalala wahlangana nonesi osemusha eTshwane okuyinto athe ingenzeka nakowaseNingizimu Afrika.