Uvalo ngonyamalale ecela ukugitsheliswa
UMNDENI wowesifazane waKwaDlangezwa, eMpangeni, osekuphele isonto enyamalele, usola umkhuba wokucela ukugitsheliswa ezimotweni ngokunyamalala kwakhe njengoba kuthiwa amatekisi ayindlala.
UNksz Mbali Gumede (22), obesanda kuthweswa iziqu zeBA in Correctional Studies e-University of Zululand, Ongoye, kuthiwa wanyamalala ngoMsombuluko odlule eya enyuvesi. Kuthiwa ubesezama ukufaka izicelo zomsebenzi njengoba ethweswe iziqu ngoMeyi nonyaka. Udadewabo uNksz Tobo Mthembu uchaze udadewabo njengomuntu ongenabo abangani abaningi futhi ongazuli. Uthe akukaze kwenzeke ahambe ekhaya engaziwa. “Waphuma ekhaya eya enyuvesi ngoba kukhona ayokulungisa. Kunezikhala zomsebenzi ebezivelile, efuna ukufaka izicelo zazo. Ubengajwayele ukuvakasha esasnyuvesi ngoba ngisho esafunda ubeqeda ikilasi abuye ekhaya.” UNksz Mthembu uthe ngosuku okunyamalele ngalo udadewabo wayekhohlwe ukumphathisa okuthize, wamshayela ucingo emuva kwemizuzu engu15 ehambile. “Ngathuka uma ngingamtholi ocingweni seluvaliwe. Ngibuze kubangani bakhe nakuyise wengane naye wathi akamazi. Okusithusayo ukuthi omakhelwane abambona emile esitobhini bathi babona imoto ebovu engenazo izinombolo. Bathi uMbali wakhala ngokuthi kunendoda ebimqhweba, abazange besabona ukuthi wagcina egibeleni.” Uthe umkhuba ojwayelekile ukuthi umphakathi ocele ukugibela ezimotweni ezincane ngoba amatekisi ayindlala kule ndawo, nerenki ikude. Uveze ukuthi yibhasi egitshelwayo nayo ehamba ngezikhathi ezithize. Umndeni kaNksz Gumede uvule icala lokunyamalala kwakhe esiteshini samaphoyisa eMthunzini kanti usaqhubeka nokuzama ukumthungatha. Okhulumela amaphoyisa KwaZuluNatal uCaptain Nqobile Gwala ukuqinisekisile ukuthi livuliwe icala. Uthe amaphoyisa aseMthunzini asaphenya ngokunyamalala kukaNksz Gumede. UMnuz Ntuthuko Makhanya oyikhansela ku-ward 34, uthe kuyiqiniso ukuthi kunenkinga yamatekisi kule ndawo. “I-ward yethu isanda kusungulwa. Besisazama ukuxoxisana nosomatekisi ukuthi kube namatekisi azoba khona njalo ukuthutha ngoba le ndawo ikuN2 eduze komgwaqo kodwa azikho izimoto. Okwamanje umphakathi uthembela ekuceleni ezimotweni ezidlulayo.”