Uyelashwa umfundi ‘oshaywe’ wuthisha
USELASHWA wudokotela wengqondo umfundi ona-12 ongqimuzwe wuthisha ekilasini ngoba emsola ngokuhlupha abafundi besifazane.
Umfundi wasePrestbury wesilisa kuthiwa waba nokuhilizisana ngamazwi nomfundi ekilasini, uthisha kuthiwa wagxavuna umfundi wamcindezela edeskini, wamkhahlela, wamklinya.
Unina walo mfundi, naye ongeke adalulwe ukubalekela ukucwaswa kwengane yakhe uveze ukuthi lolu daba lunyathelwa ngezinyawo futhi ingane yakhe ayisakwazi ukufunda ngendlela. “Kunzima enganeni yami selokhu yashaywa wuthisha njengoba isihamba udokotela omyala ngokwengqondo. Unokukhohlwa uma ethunywa futhi nasesikoleni uyasaba ngoba uthisha owamshaya ulokhu emfaka imibuzo.”
Okhulumela amaphoyisa KwaZulu-Natal uColonel Thembeka Mbhele uthe: “NgoMeyi 17 ekuseni umfundi wasePrestbury kunezinsolo zokuthi washaywa wuthisha. Icala lokushaywa lavulwa esiteshini sasePrestbury. Umsolwa ona-29 waboshwa, wavela enkantolo yeMantshi yaseMgungundlovu ngoJune 7.” Idokodo ngecala lisagcinwe enkantolo.
Umzali walo mfundi utshele Isolezwe ukuthi wezwa ngendaba ukuthi uthisha uboshiwe waphinde watshelwa ukuthi icala liphelile njengoba uthisha eqhubeka nokufundisa ingane yakhe.
“Okungiphatha kabuhlungu indlela isikole esisingethe ngayo udaba njengoba uthisha eqhubeka nokufundisa ingane yami. Ingane yami iphila ngokusaba nokuphazamisa ukufundwa kwayo,” kusho umzali.
Kuthintwa uMnyango wezeMfundo KwaZulu-Natal uMnuz Scelo Khuzwayo okhulumela wona uthe bazolubhekisisa lolu daba.
“Ngasohlangothini lwethu sizosilandela isikhalazo somzali ngokwenzelela kwesikole siphinde siphenye izinsolo zokushaywa kwalo mfundi. Akekho uthisha ovumelekile ukuba ashaye ingane. Mayelana nokuvulwa kwecala ngeke siphawule sizokuyekelela kwingalo yomthetho,” kusho uKhuzwayo.