Induna idutshulwe yabulawa erenki
KUSOLWA umbango wesikhundla ngokubulawa kwenduna erenki yamatekisi eMooi River.
UMnuz Mdodile Mngadi (60) udutshulwe ngoMsombuluko emini ngabasolwa maqede babaleka. UMngadi obeyinduna KwaMphumela, eMooi River, kuthiwa kukhona abantu abebegibele evenini yakhe esebehlisa ngesikhathi ehlaselwa abasolwa.
Okhulumela amaphoyisa KwaZulu-Natal uColonel Thembeka Mbhele uthe kuvulwe amacala okubulala.
“Owesilisa ona-60 udutshulwe ngo-11.30 ekuseni erenki yamatekisi. Imbangela yokubulawa kwakhe ayaziwa. Amaphoyisa aseMooi River aphenya icala lokubulala akekho oboshiwe.”
Kuthintwa umndeni wale nduna uMnuz Jabulani Mngadi, uthe uyise uhlala eMooi River njengoba yena eseMuden (ngaseGreytown) okwenza angabi nolwazi olugcwele ngokuhlaselwa kwakhe.
“Ngisathole ukuthi ubaba ubulewe edolobheni, imininingwane egcwele ngokuhlaselwa kwakhe nembangela, ngizokuthola uma sengisekhaya emndenini wami,” kusho uMngadi.
Ube esenikeza Isolezwe inombolo yamanye amalunga omndeni aseMooi River. Ucingo beluvaliwe. Umthombo weSolezwe uveze ukuthi kukhona abebegaqele lesi sikhundla sokuba induna njengoba kuthiwa siyaholela. Umufi kuthiwa ubeneminyaka eyinduna, eqotho nethenjwa inkosi.
Unobhala wenkosi uNgangendlovu Mchunu, uNksz Nokulunga Mchunu, uthe abazi ngembangela yokubulawa kwenduna.
“Sisalinde ukuthola ngokwenzekile emndenini wenduna njengoba sizohlangana nabo ngoLwesine. Mayelana nezinsolo zombango wezinduna, into esingayazi nesingaboni ukuthi iyona engaba imbangela yokubulawa kwenduna. Sisadidekile nje ngokwenzekile,” kusho uNksz Mchunu.
UNksz Mchunu uthe induna eshonile ibihola kodwa ngeke adalulala imininingwane njengoba kumele aqale akhulume nomndeni ngesigameko.
Ngokombiko woMnyango wezokuBusa nokuBambisana neziNdaba zoMdabu KwaZuluNatal baveza umbiko othi zihola u-R7000 izinduna.