Owesifazane esikhundleni esiphezulu eDUT
OWESIFAZANE oqokwe esikhundleni sokuba nguDeputy Vice Chancellor kwiResearch, Innovations and Engagements eDurban University of Technology (DUT), ufuna kwande imikhakha ezokwenza abafundi bazimele.
USolwazi Sibusiso Moyo oneziqu zePhd kwiMaths.
Uzoqala ngoJulayi 1 kulesi sikhundla azohlala kuso iminyaka eyisihlanu.
Exoxa neSolezwe uthe umsebenzi abhekene nawo mkhulu njengoba engomunye weziphathimandla ezimbalwa ezisebenza eduze kukaVice Chancellor uSolwazi Thandwa Mthembu.
Echaza ngesikhundla aqokwe kuso uthe asipheleli nje ekubhekeni imfundo yabafundi abangaphakathi kodwa kuningi okudinga yena.
“Kumele ngihlangane nezinhlaka ezahlukene zomphakathi ukuthuthukisa imfundo esikhungweni sethu. Yimina okumele ngiqinisekise nokuthi abafundi bethu bayaqashwa uma sebethole umsebenzi nokuthi bayawathola amathuba okuyofunda phesheya, ngithole noxhaso.”
USolwazi Moyo uthe isifiso sakhe esikhulu ukuthi iDUT ibalwe namanyuvesi aphezulu e-Afrika. Uyazi nangezinselelo zabafundi abamnyama athi baqeda enyuvesi besabhekene nokuphucula isimo emakhaya, balekelele nangezimali. Uthe lokhu kwenza ukuthi babe mbalwa abaqhubeka bafunde bagogode.
“Ukufunda kwabamnyama kuncike ekutheni banayo yini imali. Yingakho kusezinhlelweni zami nokunxenxa abazoxhasa ngemifundaze. Sinabo nabafundi asebesebenza okumele sibakhuthaze ukuthi batshale imali esikhungweni ukuxhasa abasafunda. Sekumele sikhuthaze imikhakha edle ngamakhono ezokwenza abafundi bazisebenze kunokulinda ukuqashwa.”
USolwazi Moyo uke waba yiSenior Lecturer, i-Associate Director no-Associate Professor emkhakheni weMathematics nePhysics eDUT. Uqokwa kulesi sikhundla nje ubekade ebambe unyaka kuso, ebuye engamele iResearch and Postgraduate Support Directorate.
Uke waba nguMengameli weResearch Management weSouthern African Research and Innovation Management Association. Ngonyaka odlule uthole iziqu zeMaster’s Degree kwiTertiary Education Management e-University of Melbourne. Uthe uzohlaba ikhefu ekufundeni njengoba eseqokwe kulesi sikhundla kodwa usazimisele ukuqhubeka.
USolwazi Mthembu uthe uyajabula ukuthi uSolwazi Moyo ukwamukele ukuqokwa kulesi sikhundla, wabonga nomkhandlu ngokumqoka.
“Ngokwesekana nokubambisana kulesi sikhungo, siyazi ukuthi uSolwazi Moyo uzokwenza umsebenzi oncomekayo. Siyaziqhenya ngethimba lethu okubalwa naye, elenza isikhungo sifeze umbono ebuholini nasekuthuthkiseni imfundo,” kusho uMthembu.