Kwamvula amehlo ukungaqashwa kwiSelimathunzi
UKUKHALA ngaphansi ehlulwa wuLunga Tshabalala ekuzameni inhlanhla yokuba wumethuli weSelimathunzi, uLawrence Maleka akumqedanga amandla kodwa kwamshukumisela ekufuneni ukubonakala noma ikuphi kuthelevishini.
Le nsizwa izakhele igama kwabaningi ngesikhathi yethula uhlelo lwamakhwaya kuMzansi Magic, iClash Of The Choirs.
Muva nje kuvele ukuthi ingelinye lamajaji ohlelweni olusha iThe Final Cut, ezobonakala ku-SABC3, ngesonto elizayo.
Le nsizwa iveze ukuthi ngesikhathi ingalitholi ithuba lokuba umethuli wezinhlelo yavundulula kuzona zonke iziteshi zethelevishini ifuna umsebenzi.
“Ngangazi ukuthi nginalo ithalente njengoba ngangingeke ngize ngifinyelele kude kunhlolokhono ukube ngangingenalo ithalente. Ngambongela uLunga kodwa nami ngavula amehlo ngafuna umsebenzi kwenzinye izindawo,” kusho uLawrence.
Uthe umsebenzi wakhe ohlelweni iThe Final Cut ngokubambisana noKarin Van Der Laag, Mmabatho Montsho noThabang Moleya ukuthola insizwa nentokazi ezolingisa noma kumuphi umdlalo okhonjiswa kwa-SABC.
“IThe Final Cut ihambele amadolobha ahlukene kuleli ithungatha abantu abafuna ukulingisa. Ngakho manje sekuzokhonjiswa abantu abatholakale kulamadolobha bebhekana nokuqeqeshwa okwehlukene okuzobenza badlulele ezigabeni ezilandelayo.”
Esitatimendeni esikhishwe abakwa-SABC3, baveze ukuthi lolu hlelo luzokhonjiswa amasonto angu-13, lapho abantu abangu-14, bezonikezwa iziqephu ezincane abazozilingisa ukuze kubonakale ulwazi abanalo ngalo mkhakha. Bazobe sebenikwa umbhalo obhaliwe oshoyo ukuthi umdlalo uzohamba kanjani okumele bawulungiselele emizuzwini engu-15.
Kuwo lowo mdlalo bathe kuzobe kuneziqephu ezahlukene ezihlanganisa, ezothando, ezokuxabana ezokulwa nezinye ezahlukene. Kulolu hlelo izinto zizoshuba uma amajaji esenza isinqumo okukhipha oyedwa wesifazane noyedwa wesilisa esiqeshini ngasinye esizokhonjiswa kuthelevishini. Kulolu hlelo kuyashuba uma sekuqhutshekelwa phambili nabasele njengoba beya ngokuncipha futhi sekubhekwe ukuthi obani abazodla umhlanganiso.