Ikhonsathi enomyalezo oshubile
BAZOHLANGANISWA ngekhonsathi yomculo bese beyalwa ngokuhlukunyezwa kwabesifazane abantu baseThekwini abazohambela ikhonsathi yasemini ngaphandle kwaseCity Hall ngoJuni 28.
Le khonsathi iyingxenye yemicimbi eyandulela iJazz in July yokuqala ngqa ezoba seBotanic Gardens ngoJulayi 2.
Umhleli wekhonsathi uWanita Ngcobo uthe ikhonsathi yangoJuni 28 kuzoba yinto encane okuhloswe ngayo ukuqwashisa abantu ngesihlava sokuhlaselwa kwabesifazane. “Umculo uyabahlanganisa abantu. Ayikho enye indlela engcono yokudlulisa lo myalezo ngaphandle kokumema abantu edilini lomculo bese sidlulisa umyalezo obalulekile.”
Uthe bazobe behambisana nabaculi abahlukene okubalwa kubo uNaima Kay, DJ Kotin, Mondli Ngcobo nabanye. Ikhonsathi izoqala ngo-12 emini kanti kungenwa mahhala. Uthe abanye babantu abazothamela bazozibeka ethubeni lokuwina amathikithi okuya kwiJazz in July engempelasonto yeDurban July.
KwiJazz in July kuzobe kushiyelana inkundla uRingo Madlingozi, Ray Phiri, Thandiswa Mazwai, Naima Kay, Zonke, Amanda Black, Joe Nina, Robbie Malinga, Sands, UKZN Jazz Ensemble nabanye abaningi. Amathikithi omcimbi aseqalile ukutholakala eComputicket ngo-R290, R400 Goldern Circle kuthi iVIP ibe ngu-R850.
UWanita uthe athengwa ubuthaphuthaphu ngoba nabo abazibekile phansi bahambela izindawo ezahlukene benxenxa abantu ukuthi bawathenge. Ngempelasonto bahambele eRichards Bay naseMgungundlovu.