UBaxter uyoqedela umsebenzi kwiSuperSport
USEZOBUYELA kwiSuperSport United ayoqedela umsebenzi awushiyile esanake iBafana Bafana, uStuart Baxter, othole imiphumela engafani njengomqeqeshi weqembu lesizwe.
NgoLwesibili iBafana ihlulwe yiZambia ngo-2-1 kowobungani eMoruleng Stadium. Ifike kulo mdlalo ivela kobuyingqophamlando ihlula iNigeria ngo-2-0 kowokuhlungela i-Africa Cup of Nations ngempelasonto edlule.
Ngemuva komdlalo neZambia uBaxter usole abadlali ngokulala okwenze iZambia yakwazi ukubuya umdlalo sewuya ngasekupheleni, izitha zishaya amagoli amabili.
Nokho lo mqeqeshi kusamele azibeke eceleni izinkinga azibone kwiBafana, agxile ekusizeni i-United ekuvikeleni isicoco seNedbank Cup.
Amatsatsantsa a Pitori azothuthana ne-Orlando Pirates kowamanqamu weNedbank Cup eMoses Mabhida Stadium ngoJuni 24. Aseqalile ukutholakala amathikithi omdlalo ngoR60, uzoqala ngo-8.15 ebusuku.
Okhulumela inhlangano eyengamele ibhola, uDominic Chimavhi, izolo ukuqinisekisile ukuthi sisamile isivumelwano abebenaso ne-United ukuthi uBaxter uzobuyela kuleli qembu ayoqedela umsebenzi wakhe.
“Besivele sihlele ukuthi uma sesiqedile neqembu lesizwe uzobuyela kwiSuperSport,” kusho uChimavhi.
Inkontileka kaBaxter ayisayine neSafa yeminyaka emihlanu yayithi uzoqala ukusebenza ngoJulayi 1.
Namuhla i-United ibize izintatheli ukuthi zizobheka amalungiselelo ayo omdlalo weCAF Confederation Cup ezobe ivakashelwe kuwo iTP Mazembe. Lo mdlalo womlenze wesibili ungoLwesibili e-Atteridgeville, ePitoli ngo-7 ebusuku. Emlenzeni wokuqala Amatsatsantsa abuya nephuzu kubanjwana ngo-2-2.
Kulowo mdlalo uKaitano Tembo obeyiphini likaBaxter wayesebhentshini.
UBrian Moshoeshoe okhulumela i-United ukugcizelele ukuthi uBaxter ozobe ehola iqembu libhekene nePirates.
“Anginaso isiqiniseko sokuthi uzobe esekhona eqenjini kusasa (namuhla) kodwa engingakuqinisekisa wukuthi uzobe ekhona emdlalweni wePirates,” kusho uMoshoeshoe.
UBaxter unerekhodi elihle lokunqoba izicoco. Usewine ezimbili kwiSuperSport, eseTelkom Knockout neNedbank Cup ayinqobe ngesizini edlule eshaya yona iBucs kowamanqamu.