USerero uzitholele ikhaya elisha eNetherlands
UZITHOLELE ikhaya elisha eNetherlands uThulani Serero waseNingizimu Afrika ohlale isizini yonke engadlali kwi-Ajax Amsterdam.
Lokhu kuvezwe yiSBV Vitesse edlala esigabeni esikhulu kuleli lizwe izolo ekuseni lapho iveze khona ukuthi seyivumelene ngenkontileka yeminyaka emithathu noSerero. “UThulani Serero namuhla (izolo) uzoya kohlolwa isimo sakhe sempilo ngemuva kwalokho uzobe esethulwa ngokugcwele njengomdlali weqembu,” lona kube wumbhalo osekhasini leVitesse ku-Instagram obuhambisana nesithombe sikaSerero esayina amaphepha.
Ngemuva kwamahora ambalwa lo mdlali ube esethulwa ngokusemthethwni yileli qembu. IVitesse iqede endaweni yesihlanu kwi-log ye-Eredivisie ngesizini edlule. USerero ukhululwe yiqembu elikhulu kuleli lizwe i-Amsterdam ayijoyine ngo-2011. Wayehambe esuka kwi-Ajax Cape Town kade ewole imiklomelo kuleli kukhona nowomdlali ovelele nowomdlali omncane oshaye into ecokeme. Impilo ibingasekho yinhle kuSerero naleli qembu kusukela ngesizini eyandulela edlule lapho edlale khona imidlalo eyisithupha kuphela. Ekuqaleni kwedlule isizini yonke uyichithe neqembu labafana abancane ngemuva kokuchithwa wanganikezwa ngisho inombolo yejezi. Lokhu kusho ukuthi ubeseyisibukeli ngesikhathi i-Ajax eyakhiwe ngabafana abancane ihamba ize iyobhajwa kowamanqamu kwiUefa Europa League lapho ihlulwe khona iManchester United.
Ukungadlali kukaSerero kugcine kumlahlekisele ngendawo kwiBafana njengoba ubengekho eqenjini likaStuart Baxter elidlale neNigeria kowokuhlungela i-Afica Cup of Nations nowobungani neZambia. Uma efika eyithola indawo kuVitesse kungenzeka adonse amehlo kaBaxter kwazise umdlalo olandelayo welesizwe uzoze ube ngoSepthemba lapho iBafana izodlala neCape Verde kowokuhlungela iNdebe yoMhlaba eseRussia ngo2018.