Uyinyama kwawePSL uXulu ochithwe yiChiefs
USAZIMISELE ngokuhlala eNingizimu Afrika umdlali obalwe nabachithwe yiKaizer Chiefs, uSiyanda “Magazi” Xulu.
NgoLwesibili iChiefs ikhiphe isitatimende idalula ukuthi izonqamula inkontileka kaXulu, Lucky Baloyi, Camaldine Abraw noLewis Macha Isolezwe elabika ngoJanuwari ukuthi uselishiyile iqembu wajoyina elakubo iNkwazi FC.
U-Enocent Mkhabela obebolekiswe kwiPlatinum Stars yena kuthiwe uzonikwa ithuba lokuzitholela inkontileka egcwele neDikwena.
USiphelele Mthembu eyakhe inkontileka ngeke ivuselelwe njengoba iphela ekupheleni kukaJuni.
Imenenja yeChiefs, uBobby Motaung, icashunwe esitatimendeni, ithi: “Laba badlali banezinkontileka neqembu kodwa abazange balithole ithuba lokudlala ngesizini edlule. Sibone kukuhle kubona nakithina ukuthi bazame ukuqhuba imisebenzi yabo kwenye indawo.”
Isolezwe lithole ngomthombo osondelene noMagazi ukuthi lo mdlali ofike kwiChiefs kumasizini amabili edlule esuka kuRostov, eRussia, uyinyama emaqenjini akuPremier Soccer League (PSL) futhi naye usafuna ukudlala lapha eNingizimu Afrika. “Ukuhlala isizini engadlali akusho ukuthi akasasiyena umdlali osezingeni eliphezulu. Kukhona amaqembu amfunayo. Usafuna ukudlala lapha ekhaya njengoba esenentshisekelo yokudlala eqenjini lesizwe,” kusho umthombo.
Ubuye wakuveza ukuthi uXulu usalelwe iminyaka emithathu kwinkontileka ayisayina kuChiefs. “Engikwaziyo ukuthi inkontileka yakhe ayikanqanyulwa kwiChiefs. Okuvunyelwene ngakho wukuthi athole iqembu azogculiseka ngelimnika kona bese ke eyakhululeka kwiChiefs.”
UXulu, owaqoma iChiefs kade efunwa nayiMamelodi Sundowns, akaqali ukungena ohlwini lwabachithwayo kuMakhosi. Lokhu kwenzekile nasekupheleni kwesizini edlule kodwa kwagcina lingekho iqembu alitholayo njengoba kwavela ukuthi uzanyelwa phesheya kwezilwandle.
Ophethe izindaba zalo mdlalo odabuka KwaMashu, uPaul Mitchell, akazange atholakale izolo. Ucingo lwakhe belukhala lungabanjwa kwaze kwashaya isikhathi sokushicilela.
Ngokuthola kwephephandaba phakathi kwamaqembu amfunayo uXulu kukhona iCape Town City, Ajax Cape Town nePlatinum Stars.