Isikhulu seSafa sivikele uBaxter iBafana idliwa
UMENGAMELI weSouth African Football Association (Safa) uDanny Jordaan ube ngowokuqala ukuvikela umqeqeshi omusha weBafana Bafana uStuart Baxter ngemuva komphumela oshiye abaningi bephoxekile leli qembu lesizwe lishaywa yiZambia ekugcineni kowobungani obuseMoruleng Stadium, eRustenburg.
IBafana efike kulo mdlalo ihambela phezulu kulandela ukunqoba kwayo ngo 2-0 kwiNigeria kowokuhlungela i-Africa Cup of Nations (Afcon) ka-2019 kuphele lo mdlalo isibuyele kwamhlaba kulandela ukushaywa kwayo ngo 2-1.
Okuphoxe kakhulu ngalo mphumela ukuthi iBafana iqale kahle kuthembisa yaze yathola igoli ngekhanda likaLebohang Manyama kodwa uthe angawuqeda umdlalo unondweba leli qembu lesizwe bese lilandela ngemuva.
Ngaphambi kwalo mdlalo uBaxter ubeshilo ukuthi ukulindele ukugxekwa ngoba ubezosebenzisa abadlali abahluke kakhulu kunalaba abamenzele umsebenzi e-Uyo, eNigeria ngoMgqibelo.
Nangempela iqembu likaBaxter liqale kahle kodwa esiwombeni sesibili kwabuya inhlakanhlaka.
Ephawula ngemuva komdlalo uJordaan uthe, okusemqoka kakhulu ukweseka uBaxter ngoba indlela aqale ngayo koweNigeria iyalikhulisa kakhulu ithemba lemiqhudelwano yomhlaba ezayo ngonyaka ozayo nango-2019.
“Akukaze kube mnandi ukuhlulwa kodwa asikho isidingo sokuphatheka kabi ngoba umqeqeshi usawahlola amasosha akhe.
“Kuhle lokhu ngoba kusinika ithuba lokubona abanye abadlali njengoLebohang (Phiri) ebesingamazi kahle enkundleni.
“Indlela uBaxter aqale ngayo kowokuhlungela iNdebe yoMhlaba isikhulisele ithemba ngakho ke kusemqoka kakhulu ukuthi singabheki umphumela weZambia kepha sibheke okuzayo,” kusho uBaxter.
Umdlalo omqoka kuBaxter olandelayo usekupheleni kukaAgasti neCape Verede ekhaya. Lo owokuhlungela iNdebe yoMhlaba lapho iBafana iseqoqweni elilodwa nalo leli zwe (Cape Verde), Burkina Faso neSenegal. Njengamanje iBafana ilele isibili ku-Group D lapho ibambene khona neBurkina Faso ngamaphuzu amane emidlalweni emibili.
IBafana iqale eBurkina Faso yabuya nephuzu lapho idlale khona kwaba u 1-1 yase ilandela ngokunqoba kuSenegal ngo 2-1 emdlalweni namanje okusakhulunywa ngawo.
Uma uBaxter engaqhubeka lapho egcine khona kwiNigeria iBafana inethuba elikhulu lokuqoqa amaphuzu ngaphambi kwemidlalo emibili yokugcina lapho izovakashelwa khona yiBurkina Faso bese ivala ngokuvakashela iSenegal.
Le midlalo izofika iBafana isidlale kabili neCape Verde ebambe ibhuleki kuleli qoqo.
Owokuqala usekupheleni kuka-Agasti ekhaya bese kudlula izinsuku ezintathu baphinde ekuhambeni.