Mihle le midlalo idinga abaxhasi
NINA beqhawe lakithi, nina bakaPhunga noMageba, ninaBodlondlwane luyadla lubeke isihlangu emadolweni.
Ngiyakhuleka kubaphathi bomhlabathi ngisho ngikhuze isaga sethu semihla thina baphathi bezingqukuvana ezimasondosondo ngithi sonke masiziqoqe izinkayimane zethu siqhwembe ama hazard ethu ukuze sibonakale kwabanye abasebenzisi bemigwaqo yaleli likaMthaniya neyangaphandle.
Asisho siguqe eceleni lapho kuphephe khona sikhothe nanku umkhumiso wezomgwaqo nikhishelwa kwelakho lodumo lokuwela umfula ugcwele.
Namhlanje ngingqabashiya ngepeni phezu kwaleli khasi ngisantuza njengengane encane kwazise yinyanga yethu thina bantu abasha.
Kuhlale kuthiwa isizwe esiphelelwa abantu abasha asinalo ikusasa ngoba abasha namhlanje bangabanumzane nomama bangomuso. Sekukaningi ngibona ukuthi kusenemidlalo yokudumayo esithi uma siyibona siyibize ngeyabohlanga oluthize.
Phakathi kwaleyo midlalo ngibala ngisho neyombembeshwane abaqwala izintaba (scrambler) nezingqukuvana ezimasondo mane.
Ungizwa ngikhuluma kanjena nje, angithemelezi kodwa ngamehlo engqondo yokudumayo ngisemagqumeni aseNgodini eShowe phezu kweNkandla yodumo lapho kuhlelwe khona umcimbi wokudlala izithuthuthu, izimoto ezingosondonzima nokugwedla ngezikebhe.
Okufike kungihlabe umxhwele nakakhulu ukuthi abahleli balo mcimbi ozohambisana nempilo nokulala endle ematendeni, yindlu emnyama ekhonze okudumayo.
Lana ngikukhuluma ngoTP Mabaso waseMsinga.
Cabanga into yalolu hlobo ihlelwe umuntu omnyama angithi sesajwayela ukuthi uma sihlela imicimbi yezimoto sihlela into yokushaya izidudla kuphela.
Njengoba lo mdlalo uzoqala kusasa uze uyophela ngeSonto kuyacaca ukuthi kuyodela umakhasana. Uma ngizwa ngomfokaMabaso ezokuphepha zizobe zisezingeni elicokeme njengoba elindele abagibeli bezithuthuthu abasuka ngisho ngaphandle kwalesi sifundazwe.
Inkinga yami iba yodwa, abaxhasi bemidlalo efuze lena asibaboni kakhulu emidlalweni ethinta abantu abamnyama. Baphi abeziphuzo ezinika umdlandla, baphi abezinkampani zamasondo nabadayisa izithuthuthu eziyiziqwalantaba, baphi abeminyango ehlukene esihlala sibabona bexhasa amadili emiculo, baphi abezinkampani zamafutha ezimoto ngisho nabalana eKZN ababonwa nangakhalo abanye babo, abemishwalense yezithuthi baphi, baphi abenkampani ka phethroli ebesibabona bebulala inyoka njalo uma kuyimibukiso yezimoto ehlelwe omakama ngezandla eThekwini?
Into ebanga ngibuze kanje yize ngazi ukuthi abanye babo bazofika yingoba kade siseShakaskraal epulazini lika Dokotela David Ngotho lapho kade kutshekedula khona ama 4x4 abaxhasi bengekho yize lomdlalo uze wakhishwa kuthelevishini gabe Thrillseeker ka-Andre Kassim.
Ngeke sidlale ibhola lezinyawo noma lombhoxo okanye amabhayisekili sonke, kukhona abathanda izithuthuthu zejubane kukhona abathanda ezokuqwala izintaba. Lokhu kuyaphoqa ukuthi abagqugquzeli bale nto enhle kangaka engasiza nokuthi sibe nendlu emnyama kule midlalo ke bayicabangisise eyokweshela abaxhasi.
Ngenxa yokungabi khona kwabaxhasi, le midlalo ehlanganisa izinhlanga igcina idla ikhukhu lendoda.
Ngiyazi baningi abafisa ukuhlela imidlalo enje emagqumeni angasemakubo ngoba izindawo sinazo kodwa manje kusafanele isandla sigudle imvilaphu kuze kugqobhoke iphakethe kuqala ngaphambi kokuthi umcimbi ube khona.
Nathi sikhathele ukuba yizibukeli ekubeni sinalo ikhono lokuqhoqhobala lezi zinsimbi. Sikhuluma ngokuthi inyanga yentsha le sizobe sikhala ngokuthi intsha idakwa ingakwazi nokubona ehlweni ngalolu suku kodwa ukube siyayikhuthaza imidlalo enjengalena ngabe siphungula abazogcina sebewuvanzi.
Angiqondile ukushisa inkalivasi kuwo wonke umuntu kodwa ngizama ukuveza ukuthi sesikhululekile makuphele ukuthi imidlalo yokudumayo iyoze yesekwe uma kungeyabathile ezindaweni zabathile.
Thina sikhule njalo ebusika kuba nomjaho wezimoto lapho zeqa amatakisi namahhakela emahlathini nasezimobeni kodwa lapho besiba yizibukeli ngoba bekusuke kudlala abohlanga oluthile.
Ngaleso sikhathi kwakungaphethe thina manje sekuphethe thina sisazoba yizibukeli namanje? Cha angivumi benguni iminyango ethintekayo iyazazi mayikubheke lokhu nathi sipholishe amakhono okushayela mhlawumbe singagcina sesimela izwe emijahweni enzima emhlabeni.
Hhayi ngivumeleni ngehle ngobonda njengesicabucabu ngingaze ngigadle mawala kanti bebesabuka bayeza. Nathi kodwa bahleli bale micimbi masifake izicelo zokwesekwa kusenesikhathi kuzo zonke izindawo. Okunye masiqinise ukuziqeqesha ukuze ontabakayikhonjwa sibabhaxabule ngale midlalo njengoba kwenzeka ku 4x4 Challenge kwaNgotho.
Masiqhubeke nokuziphatha kahle singaphuzeli emigwaqweni nakuyona lemidlalo sinciphise izinga lophuzo sandise elokufunda amacebo angcono ukuze sihlangane sisawuphonsa umbalane nangesonto elizayo kuyo lengosi.
Uma ufuna siyiqhube lendaba ngena ekhasini Igedlela Lami with Sthembiso Shangase ku Facebook. Yimi owenu.