Ukhala ezimathonsi oka’Gunman’
UNKOSIKAZI womlingisi uJabu “Gunman” Kubheka obengcwatshwa izolo eSoweto, uCynthia Khumalo, uthi ubethelwe esiphambanweni ephila abantu abamsola ngokuthi unesandla ekufeni kwalo mlingisi.
“Kuningi okukhulunyiwe ezinkundleni zokuxhumana kodwa abantu abakaze bangibuze lutho. Ngizitshele ukuthi ngoba yimina engimbone ekugcineni kungifanele ukuthi ngihlaselwe ngalolu hlobo,” kusho uCynthia.Uthe uzibulale ngenxa yokhwantalala futhi umakadebona womlingisi uLillian Dube ukhulumile ngalokhu emngcwabeni.
Uthe uLillian Dube ubemthatha njengendodana yakhe ngoba wuye owabona ukuthi unethalente wabe esemusa eBomb Shelter ekhiqiza imidlalo yethelevishini.
“Ubenezingane eziningi nami ngishaqekile. Ngicabanga ukuthi ngenye yezinto ezenze waba nokhwantalala,” kusho uCynthia.
Uthe imbongi yabantu uMzwakhe Mbuli ibiphethe uhlelo enkonzweni yomngcwabo ebiseMthombo Wolwazi Hall, eDobsonville, eSoweto.
Uthe umyeni wakhe ufihlwe kahle emathuneni ase-Avalon.
Omunye wabangani bakaGunman (48) uThulani Didi owayedlala indawo kaPopayi emdlalweni wakuSABC 1 iZone 14, uthe uGunman nguye owaziyo ukuthi uzibulaleleni.
“Alwehlanga lungehliyo emndenini. Asingalokhu siqagela ukuthi uzibulaleleni, uye owaziyo. Uma bekungamaloyo labo bantu abame. Kusimangazile impela ikakhulukazi kuye ngoba kudala edlula ezintweni ezinzima,” kusho uPopayi. UPopayi ubekhuluma naleli phephandaba ekubo kwaGunman, eSoweto ngemuva komngcwabo. “Beziphume zonke izingwazi emngcwabeni kukhona oMenzi Ngubane noSpinash ubro wami. Bekukhona nje amajita kusukela kuYizo Yizo, Zone 14 nakwiSibaya.” Uthe bekukhona nomculi we-kwaito uMandla Spikiri. U-Enerst Msibi owayenguChester kwiYizo Yizo, uthe ujabule ngendlela umngani wakhe aphelezelwe ngayo.