Baxoshelwe amakhekhe anensangu esikoleni
akazange apholise maseko ngemuva kwalesi sigameko watshela laba bafundi ukuthi bangabuyi esikoleni.
Uyise womunye wabafundi uMnuz Jerry Nzama, uthe utshelwe ukuthi indodana yakhe yiyo efike namakhekhe ewanikwe ngomunye umakhelwane naye amaziyo.
UNzama ugxeke uthishanhloko ngokuqinisa isandla kulaba bafundi wangalivula ithuba lokuthi kube nesigcawu sokuqondiswa kobugwegwe.
“Ngiyazi ukuthi izidakamizwa ziyinkinga ezikoleni kodwa ngabe ngigezekile enhliziyweni yami ukube kuke kwaba nesigcawu sokuqondiswa ubugwegwe. Umfana watholakala enecala wase eyaxoshwa kodwa konke lokho akwenzekanga. Angazi ukuthi uzofunda kuphi ngoba uthishanhloko ngithe ngizobuza wavele wanginika i-remove wathi angizibonele ukuthi ngenzenjani,” kusho uNzama.
Uthe uthishanhloko umtshele ukuthi okwenziwe ingane yakhe nomngani wayo kuphazamise isikole sonke akafuni kuphinde kwenzeke futhi.
Laba bafundi kumanje abafundi futhi asikho isikole esibemukelayo ngoba othishanhloko bathi besaba ukuthi bazophinde benze okufanayo.
Indodana kaNzama ithe amakhekhe yayiwanikwe umakhelwane wayo obhaka amakhekhe awadayise.
Lo makhelwane uthe ubethembise ukuthi uzoyiholela u-R100 uma iwadayise wonke.
“Bengingazi ukuthi anensangu bengijabulela ukuthi ngizoba nemali eningi.”
Ngesikhathi efonelwa uthe akanayo inombolo yalo makhelwane futhi akekho ekhaya (umakhelwane).
UNzama uthe indodana yakhe uyinika u-R200 njalo ngenyanga akazi ukuthi ibize iyodayisa amakhekhe nje bekwenzenjani.
“Ngiphoxekile ngesenzo sikamakhelwane angikayi ukuyokhuluma naye ngoba ngisadiniwe, nginqena ukuthi ngingaze ngenze okuphambene nomthetho,” kusho uNzama.
UMnuz Mark Hardwick wenhlangano, iThe Gurdian enohlelo lokusebenzisana nabazali ekusizeni abafundi abaqala ukungena ezidakamizweni, uthe abadayisa izidakamizwa ababona abafundi beyimakethe yabo ngoba banemali. Okhulumela uMnyango wezeMfundo KwaZulu-Natal, uMnuz Muzi Mahlambi uthe umzali akangadlali ngothishanhloko, isinqumo sakhe besifanele.
“Izidakamizwa ziphazamisa ukufunda ezikoleni, ngeke sikubekezelele ukudayiswa kwezidakamizwa. Noma yimuphi umfundi ozobanjwa ezidayisa uzoxoshwa,” kusho uMahlambi.
Okhulumela uMnyango wezokuThuthukiswa koMphakathi KwaZulu-Natal, uMnuz Vukani Mbhele, uthe umnyango unohlelo lokusiza abafundi abanenkinga yokusebenzisa izidakamiza.
Lolu hlelo uthe lwehlukene kabili, olwabafundi abangaboshiwe nalabo asebesezinkantolo oluhlonzwa yiyo inkantolo. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.